Այսօր մեզ ներկայացավ Նոյեմբերյան քաղաքի բնակիչ 35-ամյա մի երիտասարդ, որը հայտնեց, որ ինքը եւ իր 30-ամյա կինն ամուսնալուծված չեն, ինչպես մենք գրել էինք: Տղամարդու խոսքերով՝ իր կինն այժմ ապրում է Նոյեմբերյանի հարակից գյուղերից մեկում, ծնողների տանը, նրա ծնողները այժմ Ռուսաստանում են: 5 տարի առաջ ամուսնանալով՝ զույգը բնակվել է Ռուսաստանում, պարբերաբար վերադարձել Հայաստան: Նրանք ունեն 2 տարեկան աղջիկ: 30-ամյա կինը չի ցանկանում ապրել տղայի ծնողների հետ՝ վերջիններիս հարկի տակ: Պարբերաբար ամուսինը հարեւան գյուղից աղջնակին բերում է Նոյեմբերյան՝ իր ծնողների տուն, որտեղ ինքն այժմ բնակվում է:
Ապրիլի 26-ի երեկոյան կինը Նոյեմբերյանի Զորավար Անդրանիկի փողոցում ասֆալտին պառկելով՝ պահանջել է աղջկան իրեն հանձնել: Տղամարդն ասում է, որ իր աղջնակին մի քանի օր առաջ էր Նոյեմբերյան բերել, կինը ցերեկները նրան տեսակցել է: Ամուսինն ի վերջո կնոջ պահանջը կատարել է՝ աղջկան հանձնելով մորը: Տղամարդը հույս ունի, որ առաջիկայում իր ֆինանսական վիճակը կբարելավվի, ինքը Նոյեմբերյանում բնակարան կվարձի, ուր կապրի կնոջ եւ աղջնակի հետ: Նա համոզված է, որ կհաջողվի պահպանել ընտանիքը, խուսափել ամուսնալուծությունից: Նրա խնդրանքով չենք ներկայացնում իր անուն-ազգանունը:
Ոսկան ՍԱՐԳՍՅԱՆ
