Այսօր՝ ապրիլի 30-ին, ԱԺ գազային ժամանակավոր հանձնաժողովի նախագահ Վարդան Այվազյանը եւ տնտեսագետ Վարդան Բոստանջյանն անդրադարձան «Գազպրոմ» ԲԲԸ վարչության նախագահ Ալեքսեյ Միլլերի՝ Հայաստանին մատակարարվող բնական գազի սակագինը նվազեցնելու մասին հայտարարությանը:
Նշենք, որ Ալեքսեյ Միլլերը ռուսական «Ռոսիա 24» հեռուստաալիքի «Էներգետիկա» հաղորդման ժամանակ ասել էր, թե Հայաստան առաքվող ռուսական գազի գինն իջեցվելու է 165 դոլար` 1000 խմ-ի դիմաց:
Վարդան Այվազյանի համոզմամբ, գազի սակագինը բնավ էլ չի փոխվել, քանի որ դրա դիմաց դոլարով ենք վճարում, ու դոլարի փոխարժեքի բարձրացման արդյունքում սահմանին գնած 12 % էժանացված գազը փաստացի գնվում է նույն գնով:
Վարդան Բոստանջյանն էլ համոզված է,. որ եթե անգամ Ռուսաստանը Հայաստնին գազն անվճար տրամադրի, դարձյալ նախկին գնով էր այն վաճառվելու բնակչության վրա: Նրա ձեւակերպմամբ, պատճառն այն է, որ մեր երկրում պաշտոնական տվյալներով աղքատությունը 34 % է կազմում, ու ներկա պայմաններում ՀՀ դրամը չի կարողանում մրցակցել ավելի կայուն դիրքեր ունեցող այլ արժույթների հետ:
Կարդացեք նաև
Վարդան Այվազյանը կարծում է, որ գազի գնի հետ կապված դեռ պետք է սպասել «Գազպրոմի» ու Հանրային ծառայությունները կարգավորող հանձնաժողովի հիմնավորումներին: Ըստ գազային ժամանակավոր հանձնաժողովի նախագահի, գազամատակարար կազմակերպությունները «մինուսով են աշխատել»: Պարոն Բոստանջյանը պնդում է, որ «մինուսով» աշխատածների շքեղ տները հակառակն են փաստում, ու շարքային քաղաքացուն մեկ բան է հուզում՝ ինքը օգտվելո՞ւ է գազի գնի էժանացումից:
Գոհար ՀԱԿՈԲՅԱՆ
