«Գյուղարտ» ընկերության սպանդանոցում, որը պատկանում է Քաջարանի պղնձամոլիբդենային նախկին տնօրեն Մաքսիմ Հակոբյանին, արձանագրված բրուցելոզի դեպքերի առնչությամբ քրգործ էր հարուցվել: Այսօր սննդամթերքի անվտանգության պետական ծառայության անասնաբուժության տեսչության պետ Հովհաննես Մկրտչյանը ծառայությունում հրավիրած ասուլիսում ասաց, որ Քննչական կոմիտեն կբացահայտի, թե ովքեր են իրականում մեղավոր եղել:
Մինչ այդ, պարոն Մկրտչյանը կարծում է, որ սպանդանոցի աշխատակիցները վարակվել են կենսաանվտանգության կանոնները չապահովելու պատճառով:
Հիշեցնենք, որ այս տարվա մարտ-ապրիլ ամիսներին Կապանի «Գյուղարտ» ընկերության թվով 18 կենդանի հիվանդացել է բրուցելոզ հիվանդությամբ, որն ախտորոշվել է վերջիններիս արյան կենսաքիմիական հետազոտության արդյունքներով:
Ստուգման արդյունքում պարզվել է, որ սպանդանոց մուտք գործած բոլոր կենդանիները եղել են առողջ, ինչի մասին հավաստում են Հովհաննես Մկրտչյանի ձեռքի տակ եղած փաստաթղթերը: Այսինքն` տեսչության պետի պարզաբանմամբ` քանի կենդանի մտել է սպանդանոց, այդքան առկա է փաստաթուղթ, որոնցում նշված է կենդանու առողջական վիճակի մասին տվյալներ:
Aravot.am-ի հարցին, թե հնարավո՞ր է, որ այդ փաստաթղթերը չեն արտացոլում իրական պատկերը եւ որ փաստաթուղթ տվող մարմինը հնարավոր է գրի` առողջ,
ասուլիսի մյուս բանախոս, նախարարության «Անասնաբուժասանիտարիայի, սննդամթերքի անվտանգության եւ բուսասանիտարիայի ոլորտի ծառայությունների կենտրոն» ՊՈԱԿ-ի տնօրեն Արմեն Ավագյանն ասաց` ցուցված է, որ բրուցելոզով հիվանդ կենդանին պետք է մորթվի հենց սպանդանոցում, եւ այդ պատճառով իմաստ չունի, որ փաստաթղթում կեղծվի կենդանու առողջական վիճակի մասին տեղեկությունը: Հովհաննես Մկրտչյանի պարզաբանումները` տեսանյութում
Կարդացեք նաև
Երկու մասնագետն էլ վստահեցրին, որ եթե մորթի ժամանակ պատշաճ ապահովվի
կենսաանվտանգության կանոնները, մարդիկ չեն վարակվի եւ, բացի այդ, բրուցելոզով հիվանդ անասունի միսը հենց ենթարկվում է ջերմային մշակման, հարուցիչը հեշտ մահանում է եւ այլեւս վտանգ չի ներկայացնում:
Տեսչության պետը քաղաքացիներին հորդորում է խուսափել բակերում վաճառվող կաթնամթերքից, քանի որ ոչ մի երաշխիք չկա, որ կաթնամթերքը հիվանդ կենդանունը չէ:
Հարցին, թե ինչու է տեսչությունն ուշ արձագանքել խնդրին, արդյոք Մաքսիմ Հակոբյանո՞վ է պայմանավորված, պարոն Մկրտչյանն ասաց, որ բրուցելոզի մասին ահազանգը հենց ստացել են` արձագանքել են:
Այն հարցին էլ, թե «Գյուղարտ» սպանդանոցը միջազգային չափանիշներին համապատասխան է, ինչո՞ւ են նման դեպքեր արձանագրվել, Հովհաննես Մկրտչյանն ասաց, որ միջազգային չափանիշները վերաբերում են տեխնիկական պայմաններին:
Լուսինե ԲՈՒԴԱՂՅԱՆ
