«Աստծու կողմից մարդուն տրված ամենամեծ հատկությունը երախտապարտությունն է: Մարդկային մնացած բոլոր արժանիքները՝ նվիրվածություն, սեր, հայրենասիրություն… բոլորը հետևանք են երախտապարտության: Երախտապարտ լինենք հողին, ջրին, ժողովրդին, նրանց ստեղծած մշակույթին, այն քաջ զինվորներին, որոնք մեր սահմաններն են պահպանում»,- այսօր լրագրողների հետ հանդիպման ժամանակ երգիչ, բանահավաք, ազգագրագետ Հայրիկ Մուրադյանի այս խոսքերը հիշեց «Վան» ազգագրական համույթի հիմնադիր Ռոբերտ Դաշտոյանը:
Վաղը լրանում է Հայրիկ Մուրադյանի 110-ամյակը: Այդ առթիվ «Վան-Վասպուրական» հայրենակցական միությունը համերգ է նախաձեռնել, որը տեղի կունենա վաղը՝ «Առնո Բաբաջանյան» համերգասրահում: Հայրիկ Մուրադյանի 110-ամյակին, ինչպես նաև Վանի հերոսամարտին նվիրված համերգին կմասնակցեն տասից ավելի ազգագրական խմբեր ու անհատ կատարողներ:
«Ուսանողական տարիներից Հայրիկի ձայնը թեև հնչում էր, բայց մեծ մասսայականություն չէր վայելում: Նա մեծ ճանաչում ձեռք բերեց 60-ականների վերջերից: Երբ ուսանողական միջոցառումներ էինք կազմակերպում, մի տեսակ մրցակցություն էր սկսվում մեր՝ ուսանողներիս միջև, թե ում կհաջողվի Հայրիկ Մուրադյանին հրավիրել մասնակցելու մեր միջոցառումներին: Մեզ թվում էր, թե նա այդ ժամանակների ծնունդ չէ, այլ գալիս է դարերի խորքից, առասպելական ժամանակներից: Այդքան մեղմություն, համբերատարություն, բարություն՝ ամփոփված մեկ մարդու մեջ, ես չեմ տեսել»,- ասաց «Ակունք» ազգագրական համույթի հիմնադիր անդամ Սարգիս Բաղդասարյանը:
«Չկա օր, չկա ժամ, որ չհիշենք Հայրիկ Մուրադյանին, նրա արտահայտած մտքերը, խորհուրդները»,- հավելեց «Վան» ազգագրական համույթի ղեկավար Անդրանիկ Հովհաննիսյանը:
Կարդացեք նաև
Նրա խոսքով՝ իրենք ամեն տարի Հայրիկ Մուրադյանի ծննդյան օրն այցելում են նրա շիրիմին: Իսկ այս տարի հոբելյանը կնշանավորեն նաև վերոհիշյալ համերգով:
Սիրանուշ ՀԱՅՐԱՊԵՏՅԱՆ
