ԱԺ Մարդու իրավունքների պաշտպանության եւ հանրային հարցերի հանձնաժողովում այսօր քննարկվեց Մարդու իրավունքների պաշտպանի 2014-ի զեկույցը:
Օմբուդսմենի տեղակալ Տաթեւիկ Խաչատրյանը զեկույցը ներկայացնելիս անդրադարձավ արդարադատության համակարգի խնդիրներին, մասնավորապես, քրեակատարողական հիմնարկներում գերբեռնվածությանը, սանիտարահիգիենիկ պայմաններին եւ սննդին:
Ըստ զեկույցի, «Կոշ» ՔԿՀ-ում ականատես են եղել, որ ճաշը նախապատրաստվել է մոտ 470 անձի համար, սակայն համաձայն պահեստից սննդամթերքի դուրսգրման փաստաթղթերի` սննդամթերքը տրամադրվել էր 739 անձի հաշվարկով: Բացի այդ, պահպանված սննդի օրինակների վրա ժամկետ նշված չի եղել: Իսկ ճաշացանկը հիմնականում միատեսակ է եղել:
Արդարադատության նախարարության օրինականության վերահսկողության տեսչության պետ Միքայել Մինասյանը հարցրեց՝ ինչպե՞ս եք պարզել, թե այդ ճաշը, որ պատրաստված է եղել, քանի՞ հոգու համար է: Նա ասաց, որ օմբուդսմենի գրասենյակի ներկայացուցիչները չեն արել որեւէ գործողություն, որով որոշվեր այդ օրը պատրաստված ճաշի քանակը:
Կարդացեք նաև
Օմբուդսմենի գրասենյակի ներկայացուցիչներն ասացին, որ այդ տեղեկատվությունն իրենց տրամադրել է հենց խոհարարը. «Նա անմիջական պատրաստողն է հանդիսացել սննդի: Անցյալ շաբաթ «Արթիկ» ՔԿՀ այցելություն ենք ունեցել, թե՛ աշխատակիցները, բոլորը շեշտել են, որ ամենաշատը 30 տոկոսն է օգտվում սննդից: Սնունդը թափվում է, լավ կլինի ճշտեն, թե քանի հոգի է օգտվում սննդից, որ չթափվի: Անիմաստ է այդքան ռեսուրս օգտագործելը եւ այդքան սնունդ թափելը»:
Միքայել Մինասյանի խոսքերով՝ «Սննդի մասով դժվար չափաբաժինների պահպանման վերաբերյալ որեւէ խնդիր լինի: Թունավորման հետ կապված 1 դեպք է գրանցվել մայիսին՝ «Աբովյան» քրեակատարողական հիմնարկում: Ծառայողական քննություն ենք իրականացրել՝ պատճառներից մեկը ջրամատակարարման գծի փոխարինումն է եւ ճաշարանում աղիքային ցուպիկ է հայտնաբերվել: Դրա մասին մենք ՄԻՊ-ի գրասենյակին տեղեկացրել ենք»:
Օմբուդսմենի զեկույցի համաձայն, մտահոգիչ է, որ մինչ այժմ գործում է սննդի համտեսման ձեւական պրակտիկա: Օրինակ, «Դատապարտյալների հիվանդանոց» ՔԿՀ կատարած այցի ժամանակ սննդի համտեսման եւ որակի վերահսկման մատյանում նախապես ստորագրված էր ճաշի եւ ընթրիքի համար, այն դեպքում, երբ դեռ պատրաստված չեն եղել:
Հռիփսիմե ՋԵԲԵՋՅԱՆ
