«Հատուկ քննչական ծառայության գործունեության գնահատականը» թեմայով քննարկմանը «Մեդիա կենտրոնում» մասնագետները մտահոգություն հայտնեցին ոստիկանական բաժանմունքում քաղաքացիների հանդեպ գրանցված ապօրինությունների, ՀՔԾ-ի աշխատանքում գոյություն ունեցող թերությունների մասին:
Անի Բոշյանի, Արմեն Շամիրյանի փաստաբան Տիգրան Սաֆարյանը հայտնեց, որ ոչ մի ոստիկանապետ կամ նախարար չի ընդունում, որ ոստիկանությունում կատարվել են բռնություններ քաղաքացիների նկատմամբ: Սա գալիս է նաև պրոֆեսիոնալիզմի բացակայությունից ու նշեց, թե հիմա տարածված մեթոդ է ոստիկանությունում անձանց պատանդ պահելը: Որպես օրինակ՝ բերեց Անի Բոշյանի հորը, որին պահել են ոստիկանությունում այն պայմանով, որ մինչև նրա դուստրը՝ Անի Բոշյանը չգա բաժանմունք, նրան բաց չեն թողնի:
Այնուհետև նշեց, թե ոստիկանական բաժանմունքում Անիին ստիպել են մերկանալ, ու մի քանի անգամ կքանստել՝ պատճառաբանելով, թե եղել են դեպքեր, երբ արգելված իրեր են օգտագործվել և նման միջոցով հայտնաբերվել:
Այնուհետև անտրամաբանական համարեց այն, որ Անիի գործը կարճվել է զուտ այն պատճառով, որ ոստիկանները չեն ընդունում այն տեղեկությունները, ինչ հայտնել է Անին»:
Կարդացեք նաև
Արմեն Շամիրյանի գործով՝ Տիգրան Սաֆարյանը նշեց, թե ՀՔԾ-ն բավարար քայլեր չի կատարում. «Արմեն Շամիրյանը Հրազդան ՔՀԿ-ում էր պատիժ կրում և ղեկավարության հետ գործարքի է գնացել բջջային հեռախոսներ ներմուծել և իրացնել դատապարտյալների շրջանում, որից բաժին է ստանում նաև ղեկավարությունը: Սակայն Շամիրյանը հայտնել է այդ մասին և գործը իբր ՀՔԾ-ն է քննում, սակայն ոչ անարդյունավետ, որևէ մեկի նկատմամբ ՔՀԿ աշխատողներից մեղադրանք չի հարուցվել, մինչդեռ նրանք փորձում են ամեն կերպ ճնշում գործադրել Շամիրյանի վրա, որ իր բողոքից հրաժարվի»:
Անի Բոշյանը նշեց, որ իրեն ապօրինի 10 ժամ պահել են ոստիկանությունում ու հոգեբանական ճնշումների և վատ վերաբերմունքի արդյունքում ստիպել գրել ցուցմունք, որը չի համապատասխանում իրականությանը: Անին նշեց. «Խոսքը կիբեր հանցագործության մասին է: Ասել են, եթե չգրես, կտեղափոխվես միանգամից կանանց գաղութ»:
Հայաստանի Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցը նշեց, թե քաղաքական կամք է պետք այս խնդիրները լուծելու համար. «Անի Բոշյանի, Արմեն Շամիրյանի և Ալեքսանդր Ցվերյանովի գործերի քննությունը արդյունավետ չէ, գնում է այն ճանապարհով, որ ոստիկանները մեղք չունեն: Ուստի, հետևաբար ինչո՞ւ քաղաքացու նկատմամբ սուտ մատնության գործ չի հարուցվում: Ինքնախոստովանական ցուցմունքները չեն կարող բավարար լինել, որ քաղաքացու նկատմամբ գործ հարուցվի»:
Տաթև ՀԱՐՈՒԹՅՈՒՆՅԱՆ
Լուսանկարը՝ «Մեդիա կենտրոնի»
