2014-ից ստեղծվել է «Իղձ սոցիալական ձեռնարկությունը, որտեղ աշխատում են միայն հաշմանդամ 10 աշխատակիցներ: «Մեդիա կենտրոնում» «Հաշմանդամություն ունեցող անձանց աշխատանքային իրավունքներն ու խոչընդոտները» թեմայով քննարկմանը մտահոգություն հնչեց, թե հաշմանդամություն ունեցող մարդկանց արտադրանքը լավ չի իրացվում: «Մարտունու կանանց համայնքային խորհուրդ» ՀԿ–ի նախագահ Անահիտ Գևորգյանը այս առիթով մանրամասնեց. «Երբ լսում են տեղի արտադրանք է կամ հաշմանդամություն ունեցող մարդիկ են աշխատում այդտեղ, մարդիկ այդ արտադրանքը չեն գնում: Ուստի հաշմանդամություն ունեցող անձանց արտադրանքը վատ է իրացվում»:
«Իղձ» սոցիալական ձեռնարկության աշխատակից, հաշմանդամության 2–րդ կարգ ունեցող Սուսաննա Հարությունյանը նշեց. «Ես ասեղնագործում եմ, բայց չի ցավոք, իմ արտադրանքը չի իրացվում, այդ առումով կան խնդիրներ: Լավ կլիներ, որ մեր արտադրանքը յուրացվեր»:
ՀՀ Աշխատանքի և սոցիալական հարցերի նախարարության զբաղվածության պետական գործակալության տեղեկատվության ապահովման բաժնի գլխավոր մասնագետ Լիզա Ղիասյանը նշեց, որ պետությունը ոչ մի ենթակայություն չունի իրացման հարցերը լուծելու համար, դա արտադրողի խնդիրն է: Այնուհետեւ տեղեկացրեց, որ դեռևս չկա պետական ծրագիր, որ հատուկ սոցիալական ձեռնարկություն ստեղծվի հաշմանդամություն ունեցող անձանց համար: Բայց հաշմանդամություն ունեցող անձինք օգտվում են այն իրավունքներից, որոնցից գործազուրկները:
Անահիտ Գևորգյանը մտահոգություն հայտնեց, թե հաշմանդամություն ունեցող մարդկանց խնդիրների լուծման համար հաճախ այնքան շատ բյուրոկրատական քաշքշուկներ են պահանջվում, որ մարդիկ գերադասում են իրենք ինքնուրույն լուծել իրենց խնդիրները, քան դիմել պետությանը: Նա նաև մտահոգություն հայտնեց հասարակության կանխակալ վերաբերմունքի մասին:
Կարդացեք նաև
Տիկին Գևորգյանը առաջարկեց, որ պետությունը պատվեր տա հաշմանդամություն ունեցող անձանց ձեռնարկությանը, որպեսզի նրանց արտադրանքը իրացվի:
Տաթև ՀԱՐՈՒԹՅՈՒՆՅԱՆ
Լուսանկարը՝ «Մեդիա կենտրոնի»
