Շաբաթ օրը «Դարի մենամարտում» մրցավարների միաձայն որոշմամբ Ֆլոյդ Մեդվեյզերին պարտվելուց հետո հայտնի է դարձել, որ Մենի Պակյաոն մարտից 3-4 շաբաթ առաջ վնասել է ուսը եւ այս շաբաթվա վերջին վիրահատության է ենթարկվելու: Դրանից հետո նա մարզվել չի կարողանա առնվազն կես տարի:
Մարտից առաջ երկու բռնցքամարտիկներն էլ հարցաթերթիկ են լրացրել եւ Պակյաոն վնասվածքի մասին հարցին համապատասխան նշում չի արել: Իրազեկ աղբյուրի փոխանցմամբ, իրականությունը թաքցնելու համար Պակյաոն կամ կտուգանվի, կամ կորակազրկվի, ինչի հավանական ժամկետների մասին ոչինչ չի ասվում: «Սա սովորական փաստ չէ, այլ փաստ է, որ նա ազնիվ չի եղել եւ վնասվածքի մասին չի տեղեկացրել, ինչն արգելված է կանոնակարգով», – հայտարարել է Նեւադայի նահանգի ատլետիկական հանձնաժողովի նախագահ Բոբ Բեննեթը:
Ճիշտ է, Պակյաոյի պրոումոթեր Բոբ Արումը վստահեցնում է, թե իրենք ԱՄՆ-ի հակադոպինգային գործակալությանը տեղեկացրել են բռնցքամարտիկի վնասվածքի մասին եւ ոչ ստերոիդ դեղամիջոց՝ տորադոլ, օգտագործելու գրավոր թույլտվություն ստացել, սակայն USADA նախագահ Տրեւիս Թայգարդը հակադարձել է, թե գործակալությունը ոչ մի փաստաթուղթ չի ստացել:
«Հարցաթերթիկը հակադոպինգային հարցում չէր: Պակյաոյի թիմը կամ սարսափելի սխալ է թույլ տվել, կամ նրանք ցանկացել են ինֆորմացիան թաքցնել մրցակցից: Իրականությունն այդ երկուսի միջնահատվածում է», – ասել է Թայգարդը:
Աշոտ ՀԱԿՈԲՅԱՆ