«Մեզ մեղադրում են, որ գոռգոռացել ենք Եհովայի վկաների վրա»,- այսօր մեր հետ զրույցում Արաբկիր վարչական շրջանի ոստիկանության շենքից դուրս գալուց հետո ներկայացրեց Հայաստանի Սոցիալիստական շարժման ղեկավար Ռոբերտ Ահարոնյանը: Նա ասաց, որ ոստիկանությունը վարչական տույժ է ներկայացրել՝ իրեն եւ Գլոսսա իրավապաշտպան հկ-ի ղեկավար Աշոտ Համբարձումյանին՝ մեղադրելով զանցանքի մեջ:
Պատմեց, որ իրենք պարզապես կանգնել են դրսում իրենց ստենդների մոտ կանգնած Եհովայի վկաների մոտ եւ խունկ ծխել: Եվ դա առիթ է դարձել, որ կրոնական կազմակերպության անդամները դիմեն ոստիկանություն, իսկ ոստիկանությունը իրենց արարքը որակի զանցանք եւ տուգանք նշանակի՝ 30 000 դրամի չափով:
Պարոն Ահարոնյանը նշեց, որ իրենք դեմ են տուգանքը վճարելուն: «Ներքին գործերի բաժանմունքի դեմ ոչ մի բան չունեմ, ունեմ օրենքին դեմ: Ես Հայ առաքելական եկեղեցու կողմնակից եմ, եւ ինձ դրա համար տուգանում են 30 000 դրամ: Եթե ես ինչ-որ մի տեղ խունկ եմ վառում, չեմ հասկանում՝ ինչի՞ են ինձ մեղադրում: Ես Եհովայի վկաների դեմ ոչինչ չունեմ, իրենք իրենց մեջ ինչ ուզում են թող անեն, բայց մեր ժողովրդի մե՞ջ»:
Պարոն Ահարոնյանը նշեց, որ բողոքելու է մինչեւ վերջ, դիմելու է ԱԺ, որ օրենքի մեջ փոփոխություն կատարվի. «Չթույլատրվի, որ հասարակական վայրերում, երեխաների, սոցիալական անապահով խավի մոտ կատարեն ինչ-որ ուրիշ հավատքի քարոզչություն: Մենք պետության կողմից ընդունած հավատք ունենք,- ասաց պարոն Ահարոնյանը,- Այսօր Եհովայի վկաներն ասում են, որ 15 000 հետեւորդ ունենք, դա մեծ կուսակցություն է, կերազեր ամենաընդդիմադիր կուսակցությունն ունենալ այդքան հետեւորդներ: Սա արդեն ԿԳԲ-ի խնդիրն է՝ արդյոք մենք համոզված չենք, որ մի նախագահի թեկնածու կառաջադրվի որպես Եհովայի վկա»:
Կարդացեք նաև
«Բողոքը չի համապատասխանում իրականությանը, եւ ես պատրաստվում եմ գործի մանրամասները ստանալուն պես ներկայացնել վարչական դատարան, բողոքարկել»,- իր հերթին ասաց Գլոսսա իրավապաշտպան հկ-ի ղեկավար Աշոտ Համբարձումյանը:
Մանրամասները տեսանյութում.
Հռիփսիմե ՀՈՎՀԱՆՆԻՍՅԱՆ
