Այսօր ԱԺ հայտարարությունների ժամին ՀՀԿ պատգամավոր Հայկ Գրիգորյանը սկսեց վիրավորել իր գործընկերոջը: Նա անուններ չհնչեցրեց, բայց հասկանալի էր, որ խոսքը «Ժառանգության» պատգամավոր Զարուհի Փոստանջյանի մասին էր: Նա սկսեց վիրավորել կին պատգամավորին՝ ի պաշտպանություն Սյունիքի մարզպետ Սուրիկ Խաչատրյանի:
Հայկ Գրիգորյանն ասաց, որ մտադիր չի եղել հայտարարությամբ հանդես գալ, սակայն տեսնելով, թե ինչպես է իր գործընկերը «զարկ տալիս իր երեւակայությանը եւ անիմաստ ու բովանդակազուրկ մտքեր արտահայտում այս բարձր ամբիոնից», չի կարող չպատասխանել նրան. «Ընդհանրապես դահլիճում կան հատուկենտ մարդիկ, որ շունչները պահած սպասում են, որ մի դժբախտ դեպք տեղի ունենա Սյունիքում եւ հատկապես Գորիսում, որ նրանք էլ սկսեն իրենց նեխած մտքերը կամ Գյուլնազ տատու հեքիաթները մատուցեն հանրությանը»:
Անդրադառնալով Գորիսում տեղի ունեցած վերջին դեպքերին՝ նա ասաց, որ ցանկացած մարդու համար դատապարտելի են դրանք. «Իմ մոտեցումը հետեւյալն է, ցանկացած մարդ, եթե անօրինական քայլ է կատարել, պետք է ենթարկվի պատասխանատվության: Բայց դատապարտել բառը որոշ գործընկերներիս մոտ դարձել է փնովել բառի հոմանիշ»:
Ըստ Հայկ Գրիգորյանի, Զարուհի Փոստանջյանն աշխատում է Սուրիկ Խաչատրյանի որդուն դարձնել մեր ժամանակների հակահերոս: Նա հորդորեց վերջ տալ այդ տգեղ սովորությանը՝ քաղաքական դիվիդենտներ հավաքելով՝ ուրիշներին փնովել՝ նրանց վրա ցեխ շպրտելով. «Հիմա եթե հետաքննությունը պարզի, որ Տիգրան Խաչատրյանի մեղքը այդ դեպքում հավասար է 0-ի, այսինքն, որ նա ընդհանրապես կապ չունի տղաներին հարվածելու կամ մարմնական վնասվածքներ պատճառելու մեջ, կլինի՞ այն աստիճան բարոյականություն, որ հրապարակային ներողություն կխնդրեք ձեր հայտարարությունների համար: Անկեղծ ասած, շատ եմ կասկածում»:
Կարդացեք նաև
Նա խոսեց Զարուհի Փոստանջյանի հոգեկան առողջության մասին. «Բազմազավակ մորը պատրաստ եմ տրամադրել համապատասխան հոգեկան եւ ֆիզիկական աջակցություն, որի համար կդիմեմ համապատասխան մասնագետների: Այդ գործելաոճը պայմանավորված է գործընկերոջս ընտանիքում խաղաղության մթնոլորտի հաստատմամբ»:
Հռիփսիմե ՋԵԲԵՋՅԱՆ
