Լրահոս
Օրվա լրահոսը

Լիտվական «Պոեզիայի գարուն» փառատոնն այս տարի Երևանում է հյուրընկալվել

Մայիս 22,2015 22:45

Հայաստանում են գտնվում լիտվացի ժամանակակից գրողներ Անթանաս Ա. Յոնինասը, Լյուտաուրաս Դյագեսիսը, Գիտիս Նորվիլասը: Բանաստեղծների հետ ընթերցասերների հանդիպումը տեղի ունեցավ այսօր՝ Հայաստանի գրողների միությունում (ՀԳՄ):

Հայաստանում Եվրոպայի օրվա, ինչպես նաև Լիտվայում անցկացվող հեղինակավոր «Պոեզիայի գարուն» փառատոնի շրջանակներում ՀԳՄ-ում կազմակերպված միջոցառման շրջանակներում հնչեցին բանաստեղծների ստեղծագործությունները բնագրով, հայերենով և ռուսերենով:

Նշենք, որ «Պոեզիայի գարունը» պոեզիայի ամենահին փառատոնն է Լիտվայում: Այն առաջին անգամ կազմակերպվել է 1965 թ., Լիտվայի գրողների միության կողմից: Փառատոնն ամեն տարի անցկացվում է մայիսի վերջին շաբաթվա ընթացքում:

Անթանաս Ա. Յոնինասը կրում է իր բանաստեղծ հոր անունը, որը նույնպես հայտնի բանաստեղծ է: Որդի Յոնինասը լեզվաբանության և լիտվական գրականության մեջ մասնագիտացել է Վիլնյուսի պետական համալսարանում: 62-ամյա բանաստեղծը, որը ներկայումս Լիտվայի գրողների միության նախագահն է, 11 բանաստեղծական ժողովածուների հեղինակ է:

Իսկ բանաստեղծ, Լիտվայի պետական համալսարանի փիլիսոփայության ֆակուլտետի դեկան, փիլիսոփայական գիտությունների դոկտոր Լյուտաուրաս Դյագեսիսը բանաստեղծությունների ութ, փիլիսոփայական էսսեների երեք ժողովածուների և մեկ վեպի հեղինակ է:

Բանաստեղծ Գագիկ Դավթյանը վերջերս թարգմանաբար հայ ընթերցողին է ներկայացրել հյուրերի բանաստեղծություններից մի քանիսը, որոնք էլ այսօր ընթերցվեցին հեղինակների ու թարգմանչի կողմից:

«Պոեզիայի գարունը» կամփոփվի արդեն Լիտվայում, որտեղ ՀԳՄ նախագահ Էդվարդ Միլիտոնյանը կներկայացնի Հայոց ցեղասպանությանը զոհ գնացած գրողների ստեղծագործությունների մասին զեկույց:

«Սա հրաշալի առիթ է տարբեր երկրների ու ժողովուրդների նորից կապելու մշակույթի, գրականության թելերով: Լիտվայի հետ մեր կապերն ամուր են, և առաջիկայում, կարծում եմ, ավելի կամրապնդվեն»,- ասաց Էդվարդ Միլիտոնյանը:

ՀՀ-ում Լիտվայի Հանրապետության արտակարգ և լիազոր դեսպան Էրիկաս Պետրիկասն իր ուրախությունն արտահայտեց, որ Լիտվայի ամենահին մշակութային փառատոներից մեկն այս տարի անցկացվում է Հայաստանում. «Եվ դա պատահական չէ. դեռ նախորդ տարի ես զրույց ունեցա Է. Միլիտոնյանի հետ, և արդյունքը չուշացավ: Այն անցկացվել է յոթ երկրներում, և ես շատ ուրախ եմ, որ Հայաստանն էլ ավելացավ այդ երկրների շարքում»,- ասաց դեսպանը:

Սիրանուշ ՀԱՅՐԱՊԵՏՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Մայիս 2015
Երկ Երե Չոր Հնգ Ուրբ Շաբ Կիր
« Ապր   Հուն »
 123
45678910
11121314151617
18192021222324
25262728293031