Լրահոս
Օրվա լրահոսը

«Կարգին տղա է՝ կուշտ, կերած ու տեսած». Արտաշատ քաղաքը՝ ընտրություններին ընդառաջ. (Տեսանյութ, ֆոտոշարք)

Մայիս 22,2015 23:20

Հունիսի 7-ին Հայաստանի մի շարք համայնքներում քաղաքապետի ընտրություններ են: Aravot.am-ն այսօր Արտաշատ քաղաքում էր, որտեղ քաղաքապետի պաշտոնում պայքարելու համար գրանցվել է երկու թեկնածու՝ Հովհաննես Ղազարյանը, որը նախկինում «Հայռուսգազարդի» Արարատի մասնաճյուղի ղեկավարն էր, եւ վարչապետ Հովիկ Աբրահամյանի որդի Արգամ Աբրահամյանը:

Մեր շրջայցի ընթացքում նկատեցինք, որ քաղաքում դեռ թեկնածուների մասին պաստառներ չկան, նախընտրական շտաբներ ունի միայն Արգամ Աբրահամյանը: Նրա շտաբի անդամների հետ զրույցում պարզեցինք, որ քաղաքում կան նախընտրական 12 շտաբներ: Թեկնածուի գովազդային պաստառներն առայժմ միայն շտաբների դռներին են եւ ներսում՝ պատերին են փակցված:

Հիշեցնենք, որ թեկնածուներից Հովհաննես Ղազարյանը մեզ տեղեկացրեց իր ինքնաբացարկ հայտարարելու մտադրության մասին ավելի ուշ: Մեր՝ բնակիչների հետ զրուցելու ժամանակ՝ դեռ այդ մասին  ոչ ոքի հայտնի չէր:

Արտաշատում բնակիչները հիմնականում խուսափում էին մեզ հետ ձայնագրիչի կամ տեսախցիկի առջեւ խոսելուց, առանց դրանց, խոսում էին անկաշկանդ:

IMG_0004 IMG_0006 IMG_0010 IMG_0014

Արտաշատ մտնող ճանապարհներից եզրին մեզ հանդիպած առաջին բնակիչները երիտասարդ կանայք էին, որոնց համար քաղաքի մտահոգող խնդիրներից էր երեխաների համար նախատեսված խաղահրապարակների բացակայությունը: Հետո նրանցից մեկը մատնանշեց այն ճանապարհը (մարզպետարան տանող), որն անցնում էր իրենց տների կողքով. ոչ մի ճանապարհային նշան չկա, մեքենաները մեծ արագությամբ են անցնում, իսկ այդտեղ երեխաներ են խաղում: Հետո բողոքեցին աշխատատեղերի բացակայությունից:

Իսկ երբ հարց բացվեց թեկնածուների մասին, միայն հիշեցին՝ վարչապետի որդուն՝ Արգամ Աբրահամյանին. «Ասում են՝ ինքը շատ թասիբով տղա է, հասնող, որ ընտրվի, երեւի մի բան կանի»,- ասաց նրանցից ամենաերիտասարդը:

Մեկն էլ ավելացրեց. «Դե մեկ է, արդեն ամեն ինչ որոշված է, ում էլ ընտրենք, ինքն է լինելու, ավելի լավ է իրեն ընտրենք»:

Մեր հարցին՝ մյուս թեկնածուի մասին ի՞նչ գիտեք, պատասխանները նույնն էին՝ առանձնապես չեն ճանաչում, կարծես թե երկար ժամանակ այստեղ չի էլ ապրել:

Մեզ հանդիպած երկու տղամարդիկ պնդում էին, որ անպայման հրապարակման մեջ նշեմ, որ Արգամ Աբրահամյանը «կարգին տղա է՝ կուշտ, կերած ու տեսած», դրա համար իրեն պետք է ընտրել, սակայն ոչ մի դեպքում չհամաձայնվեցին, որ ձայնագրենք իրենց խոսքերը: «Ինքը որ ընտրվի, քաղաքի համար շատ լավ կլինի»: Մյուս թեկնածուին, կարծես չէին էլ ճանաչում, համենայն դեպս, խուսափեցին որեւէ բան ասելուց:

Մեր զրուցակիցներից «ամենահամարձակը» Արտաշատի քաղաքացի Առաքելյան Սոֆիկն էր, որը տեսախցիկի առջեւ ներկայացրեց քաղաքում առկա խնդիրները, թեկնածուների մասին խոսելիս մեր օգնությամբ միայն մտաբերեց Արգամ Աբրահամյանին, մյուս թեկնածուի մասին էլ խոսելիս ասաց. «Մյուս թեկնածուն ո՞րն է, սաղից էլ գոհ եմ, դժգոհ չեմ, փառք Աստծո գործս եղել է, եկել են, օգնել են: Մուրադյանն էլ է լավ եղել մեր հանդեպ, վատ չի եղել …»

Մանրամասները՝ տեսանյութում:

Հռիփսիմե ՀՈՎՀԱՆՆԻՍՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Մայիս 2015
Երկ Երե Չոր Հնգ Ուրբ Շաբ Կիր
« Ապր   Հուն »
 123
45678910
11121314151617
18192021222324
25262728293031