Այսօր խորհրդարանում մեկնարկել է 2014 թվականի բյուջեի կատարման հաշվետվության ներկայացումը։ Վարչապետ Հովիկ Աբրահամյանը հազիվ կես ժամ մասնակցեց քննարկումներին: Նա նաեւ բյուջեի կատարողականի վերաբերյալ իր դիրքորոշումը չբարձրաձայնեց:
Ներկայացնելով անցյալ տարվա բյուջե կատարողականը՝ ՀՀ ֆինանսների նախարարի տեղակալ-գլխավոր գանձապետ Ատոմ Ջանջուղազյանն ասաց, որ 2014 թվականին 5,2 տոկոս տնտեսական աճ է գրանցվել։ ՀՀ տնտեսական ցուցանիշները, բնականաբար, կապված են համաշխարհային տնտեսության անկման հետ,այդ թվում նաև ՀՀ գործընկեր պետությունների: Մասնավորապես, տնտեսական աճի ցածր ցուցանիշը ՌԴ-ի տնտեսության ցածր աճով է պայմանավորված:
Հաշվետու տարվա համար արձանագրված ցուցանիշներով՝ գնաճը եղել է 4,6։
Ավելացել է նաև գործազրկության թիվը, այն նախորդ տարվա համեմատ աճել է 1,4 տոկոսով կամ գործազուրկների մակարդակը հասել է 17,6 տոկոսի։
Կարդացեք նաև
Անցյալ տարի պետական աշխատողների աշխատավարձերը բարձրացել է 9 տոկոսով, իսկ մասնավոր սեկտորում` 7,3 տոկոսով։
2014 թվականին նվազել են արտահանման աճի և ներմուծման աճի տեմպերը, ինչը գլխավոր գանձապետ Ատոմ Ջանջուղազյան կապում է համաշխարհային տնտեսության ցածր աճով, ինչպես նաև համաշխարհային շուկայում ռուսական ապրանքի գների անկմամբ։
ՀՀ պետական բյուջեից արտաքին պարտքի սպասարկման համար ծախսվել է 61 միլիարդ դրամ, 28 միլիարդ դրամ տրամադրվել է սուբսիդիաներին։ Նախորդ տարվա համեմատ՝ 2014 թվականին ավելի շատ է ծախսվել պետության պահուստային ֆոնդից՝ 47 միլիարդ։
Բյուջեի պակասորդը 2014 թվականին գնահատվել է 2 տոկոս, թեև կանխատեսված է եղել 2,34 տոկոս։
Նելլի ԳՐԻԳՈՐՅԱՆ
