Այսօր, ինչպես Հայաստանի մի շարք համայնքներում, այնպես էլ Արտաշատ քաղաքում, նախատեսած էր էլեկտրաէներգիայի թանկացման դեմ բողոքի ակցիա:
Կեսօրին՝ ժամը 14-ին, Արտաշատի քաղաքապետարանի դիմաց բողոքի ակցիան մեկնարկեց եւ քիչ անց ավարտվեց: Նախաձեռնողներն ու մասնակիցները Հայ ազգային կոնգրեսի Արտաշատի տարածքային կառույցի անդամներն էին, որոնց թիվը տասնյակի էլ չէր հասնում: Նրանք իրենց հետ բերել էին ցուցապաստառներ եւ նամակ՝ հասցեագրված Արտաշատի քաղաքապետին:
ՀԱԿ-ի Արտաշատի տարածքային կառույցի ղեկավար Վիկտոր Գասպարյանը Aravot.am-ի հետ զրույցում բողոքի մասնակիցների սակավությունը բացատրեց նրանով, որ աշխատանքային ժամ է, բացի այդ՝ երեկոյան նախատեսում են միանալ Երեւանում տեղի ունենալիք երթին: Նա ասաց, որ Արտաշատ քաղաքում եւ շրջակա գյուղերում մարդկանց շրջանում հարցումներ են արել, եւ պարզել, որ 95 տոկոսը չի ցանկանում, որ էլեկտրաէներգիան թանկանա: Հիմա էլ եկել են այդ մասին նամակ հանձնելու քաղաքապետին՝ հույս ունենալով, որ նա բողոքը կհասցնի կառավարություն եւ Հանրային ծառայությունները կարգավորող հանձնաժողով:
Կարդացեք նաև
Անդրադառնալով՝ ՀԷՑ-ի պատճառաբանություններին, թե ինչու է թանկանում էլեկտրաէներգիան, Վիկտոր Գասպարյանն ասաց. «Թանկացումը, իմ կարծիքով, իրական այդ թվերը չեն համապատասխանում իրականությանը, որովհետեւ նախորդ թանկացումն էլ, իմ կարծիքով, մի բան էլ ավել էր: Ավելի լավ կլիներ, որ նրանք կոնկրետանային, իրենք իրենց աշխատանքը տնտեսեին իրենց ներսում, ոչ թե ժողովրդի հաշվին փակեին այդ գումարները, իրենց պարտքերը»:
Մանրամասները՝ տեսանյութում.
Նամակը հանձնելուց հետո պարոն Գասպարյանից հետաքրքրվեցինք, թե ինչ են կարծում՝ ինչ վերաբերմունք ունի Արտաշատի քաղաքապետը թանկացումների վերաբերյալ: Նա պատասխանեց, որ կարծում է քաղաքապետն էլ է դեմ դրան եւ ընդհանրապես ոչ ոք կողմ չէ, որ էլեկտրաէներգիան թանկանա. «Մինչեւ ձեր գալը քաղաքապետարանի աշխատողներն ասում էին, մենք էլ ենք միանում ստորագրահավաքին»,- ասաց նա:
Aravot.am-ը փորձեց խոսել նաեւ Արտաշատի բնակիչների հետ՝ պարզելու նրանց վերաբերմունքը թանկացան վերաբերյալ: Չնայած մենք նախկինում արդեն նկատել էինք, որ այստեղ բոլորը խուսափում են տեսախցիկի եւ ձայնագրիչի առջեւ խոսելուց, այնուամենայնիվ կրկին զարմացանք տասնյակից ավելի մարդկանց՝ հարցազրույց տալու մերժումը լսելիս: Առանց ձայնագրիչների բոլորն անկեղծ էին. «Մենք ի՞նչ կարանք անենք, որ, իրենք կորոշեն, իրենք կստորագրեն, կդնեն ղրաղ»,- ասաց մեզ հանդիպած կանանցից մեկը:
«Ի՞նչ ասեմ, ո՞ր մեկն ասեմ, ոչ մեկն էլ չեմ ասի»,- ասաց մի տղամարդ ու հրաժարվեց բառ ասելուց: Տոնավաճառի կանանցից մեկին ներկայանալուց հետո, հարցրի. «Ի՞նչ կարծիք ունեք էլեկտրաէներգիա…՞»: Նա, չսպասելով մեր մտքի ավարտին, միանգամից ասաց. «Շա՜տ գոհ ենք, լուսերը նորմալ միացնում, անջատում են»: Հետո ես՝ տարակուսած. «Կո՞ղմ եք թանկացմանը»:
«Ի՞նչ թանկացմանը, հա՜, թանկացումը նկատի ունեք, իհարկե կողմ չենք, դեմ ենք, բայց ի՞նչ պիտի անենք որ»:
Տոնավաճառում հավաքված մի խմբի մոտեցանք՝ նրանցից պարզելու իրենց կարծիքին ու դիրքորոշումը հարցի վերաբերյալ: «Ճիշտ են անում,- ասաց մի երիտասարդ,- քիչ է դա դեռ»:
Կողքից մի կին էլ՝ թե կատակ է անում, աղջիկ ջան, դեմ է: «Դեմ չեմ»,-պնդեց երիտասարդը: Հավաքվածներին հարցրինք՝ գիտե՞ն, որ այսօր Երեւանում բողոքի մեծ երթ է լինելու ընդդեմ էլեկտրաէներգիայի թանկացման, իրենք չեն մասնակցելու՞: Երիտասարդը նախ ստուգեց արդյոք ձայնագրում ենք՝ ասելով՝ մի բան չասենք, տանեն գլուխներս խուզեն, հետո համոզվելով, որ չենք ձայնագրում՝ հարցրեց մեզ. «Դու Արտաշատի՞ց ես: Մեր մոտ ոչ մեկը ոչ մի երթի չի մասնակցում, ինչ երթ էլ լինի, չգիտե՞ս: Ո՞վ է ձեռ քաշել իր գլխից»:
Հռիփսիմե ՀՈՎՀԱՆՆԻՍՅԱՆ
