Այսօր Գյումրու քաղաքապետարանի մոտ գտնվող Շահումյանի արձանի մոտ սկսվեց երթ դեպի Շիրակի մարզպետարան, որն ուղղված էր հոսանքի չհիմնավորված թանկացման դեմ: Բողոքի երթի մասնակիցների թիվը մեծ չէր, սակայն շատ էին նրանց հավանություն տվողները, ծափահարողները. երթի մասնակիցներն անցնում էին Գյումրու կենտրոնական հատվածով, որտեղ մեծ թվով խանութներ կան, բացօթյա սրճարաններ:
Բոլորը խանութներից դուրս էին ելնում, գլխով կամ ձեռքով հավանություն տալիս, սրճարաններում նստածները, լսելով լոզունգները, ծափահարում էին: Ցուցապաստառներից գլխավորը սեւ ժապավենի գրված ու համացանցում արդեն իսկ մեծ տարածում գտած գյումրեցիների հանրահայտ ամոթանքն էր. «Դեմ ենք հոսանքի թանկացմանը, կդորըմ մարդ էղեք»:
Կարդացեք նաև
Գյումրեցի բողոքավորները հայրենասիրական երգեր էին կատարում, ամոթանք տալիս հայրենի իշխանություններին, նշում, որ ոչ մի լումա ավելի չեն մուծի «ՀԷՑ-ի հաստավիզների» կատարած թալանի համար: Նրանք գլխավոր դատախազից պահանջում էին քրեական գործեր հարուցել ժողովրդի հաշվին հարստացած թալանչիների նկատմամբ:
Ըստ նրանց, վերջիններս ճաղերի հետեւում պետք է հայտնվեն: Նրանք բաց նամակներ էին պատրաստել ՝ ուղղված Գյումրիի քաղաքապետ Սամվել Բալասանյանին ու Շիրակի մարզպետ Ֆելիքս Ցոլակյանին:
Քաղաքապետարանի դիմաց երկար ժամանակ ոչ մի պաշտոնյա չէր մոտենում նրանց նամակը վերցնելու, ամոթանք տալուց ու այս կառույցի դիմացից հեռանալուց հետո նոր միայն քաղաքապետարանի աշխատակազմի ղեկավար Ռոբերտ Ասատրյանը վայր իջավ ու վերցրեց նամակը: Իսկ Շիրակի մարզպետարանում երթի մասնակիցներին դիմավորեց մարզպետարանի աշխատակազմի ղեկավար Խաչատուր Պողոսյանը՝ ասելով, որ պատրաստ է լսել նրանց:
Բողոքի երթը ավարտվեց Շիրակի մարզպետարանի դիմաց: Հավաքվածները հայտարարեցին, որ իրենք հաղթանակ են տանելու, ոտքի կկանգնեն ու կպաշտպանեն իրենց իրավունքները:
Նկատենք, որ մոտ մեկ ու կես ժամ տեւած երթի ամբողջ ընթացքում ոստիկանները պահպանեցին հասարակական կարգը, եւ ոչ մի խախտում տեղի չունեցավ:
Նունե ԱՐԵՎՇԱՏՅԱՆ
