Այսօր Արարատ քաղաքում, ինչպես Հայաստանի մի շարք այլ համայնքներում , նախատեսվում էր անցկացնել էլեկտրաէներգիայի թանկացման դեմ բողոքի ակցիա:
Նշանակված ժամին՝ 18:00-ին, ակցիայի անցկացման հայտարարված վայրում՝ Վազգեն Սարգսյանի անվան հրապարակում, քիչ թվով տղամարդիկ էին հավաքված: Մոտենալով նրանց՝ պարզեցինք՝ ՀԱԿ-ի Արարատի տարածքային կառույցի անդամներն են: Նրանք ասացին, որ սպասում են՝ այլ քաղաքացիներ հավաքվեն, մատնանշեցին, որ այն կողմում էլ քաղաքապետարանի աշխատակիցներն են կանգնած՝ երեւի նրանք էլ են ուզում միանալ բողոքի ակցիային:
Քաղաքապետարանի դիմաց հավաքվածներից առանձնացավ Կարինե Ալեքսանյանը, որը մեր հետ զրույցում ասաց, որ չնայած ինքն այսօր աշխատում է քաղաքապետարանում եւ գուցե իշխանությունների կողմից «նկատողություն» ստանա, այնուամենայնիվ չի վախենում իր բողոքի ձայնը բարձրացնելուց. «Ինչու՞ պիտի վախենամ: Այդ ի՞նչ աշխատավարձ ենք ստանում, որ տանք միայն պետական վարձերը: Մենք էլ մարդ ենք, ապրել ենք ուզում, երեխեքի տեր ենք: Մենակ իրե՞նք են ապրել ուզում: Ուզում ենք ապրել: Մեր երեխեքին մենք ո՞նց պահենք. ստացած աշխատավարձը կամ տալիս ենք վարկ, կամ վարձ»:
Կարդացեք նաև
Անդրադառնալով ՀԷՑ-ի որոշմանն ու բերած պատճառաբանումներին՝ տիկին Ալեքսանյանն ասաց. «Ես չգիտեմ՝ իրենք ինչի՞ հիման վրա են թանկացրել, բայց թերթեր կարդում ենք, գիտենք, որ պակասորդ ունեն: Թող իրենց այդ եվրոռեմոնտները չանեն: Ես իրենց կողքի հիմնարկում աշխատել եմ մեկ տարի, մենք մտել ենք, զարմացած ենք մնացել, թող չանեին: Թող մի քիչ էլ ժողովրդին խղճան»:
Մեր զրուցակիցը բողոքի ակցիային միանալու մարդկանց պասիվությունը նախ պատճառաբանեց նրանով, որ շատերը նախկին քաղաքապետի հոգեհանգստին են գնացել մասնակցելու, հետո էլ ավելացրեց. «Երկրորդն էլ, ոստիկանությունը երեւի թույլ չի տալիս: Չեք տեսնու՞մ պատերի տակ ոստիկաններ են կանգնած: Չեք տեսնու՞մ տարբեր տեղեր խումբ-խումբ հավաքվել են, բայց վախենում են ժողովուրդը: Ինչի՞ համար, հո իրենցից փող չենք ուզում, ուզում ենք, որ մեր հոսանքը չթանկացնեն»:
Վազգեն Սարգսյանի հրապարակում, բողոքի ակցիա այդպես էլ չկայացավ: Հավաքվածները միայն որոշ պայմանավորվածություններ ունեցան՝ հետագայում հնարավոր ստորագրահավաք կազմակերպելու համար: Ներկաներից ՀԱԿ անդամ Արսեն Հակոբյանը մոտեցավ, Արարատի քաղաքապետարանի աշխատակազմի ղեկավարի հետ զրուցեց, հետո մեզ ասաց, որ պայմանավորվել են վաղը քաղաքապետի հետ հանդիպել. «Երեւի քաղաքապետը վերեւներին կասի: Վաղը քաղաքապետը ներկա կլինի, կխոսենք իր հետ, մնացածը կհասկանանք: Ժողովուրդը դեմ է թանկացմանը»,- ասաց նա:
Հրապարակում հավաքված Արարատի բնակիչներից Մուրադ Սադոյանը մեզ հետ զրույցում նշեց, որ ցավում է, որ շատ մարդ չի եկել մասնակցելու բողոքի ակցիային. «Թող բոլորը հասկանան, որ այս ամեն ինչը վերաբերում է ժողովրդին, ու՞մ են դրել էշի տեղ»,- ասաց նա: Հետո ավելացրեց, որ եկել է «Ռոբերտ Նազարյանի եւ իր կոլեգիայի ախոռները մաքրելու ժամանակը»:
«Թող հելնի, այնտեղից ռադ լինի, գնա, թե չէ, որ եկան ժամանակները, գլուխը կջարդի ժողովուրդը իր կաբինետի մեջ»,- ասաց Մուրադ Սադոյանը: Նա վստահ նշեց, որ ժողովուրդը կհամախմբվի, եւ թող Ռոբերտ Նազարյանը լավ իմանա, որ սա իր վերջն է: «Սա քաղաքականություն չի, սա զուտ մեր ընտանիքների պայքարն է, որ մեր ընտանիքները կործանվում, քայքայվում, թուլանում, ծերանում եւ մի ավելորդ բեռ են դառնում ու գերեզման գնում: Այսպե՞ս է պահելու Ռոբերտ Նազարյան կոչեցյալը այս ժողովրդին, որ դատապարտված է ինքնաոչնչացման»:
Արարատի բնակիչը վստահ է, որ մի դրամ էլ չպետք է թանկանա էլեկտրաէներգիան. «Եթե թանկանա, ինքը իր գրպանից պիտի դնի: Այդ տնօրենները, տառականները որ կան, լեքսուսներ են քշում, ջիպեր են քշում, որ հիմա դարձել է 250-300 000 միլիոն դոլար, թող իրենք բերեն այդ ժողովրդի պարտքը տան: Սա սկիզբն է, բա որ ամբողջ ժողովուրդը հելնի՞… Ռոբերտ Նազարյան, գլուխդ կջարդենք, որդի նման, հերիք է ժողովրդի գլխին պոպոկ ջարդեք»:
Մանրամասները տեսանյութում
Հռիփսիմե ՀՈՎՀԱՆՆԻՍՅԱՆ
