Ազատության հրապարակից մեկնարկել է ընդդեմ հոսանքի ապօրինի թանկացման երթը: Հիշեցնենք, որ ՀԷՑ-ը դիմել է հանրային ծառայությունները կարգավորող հանձնաժողովին՝ հոսանքը 40-53%-ով բարձրացնելու համար: Հազարավոր քաղաքացիներ դուրս են եկել փողոց պայքարելու իրենց բնորոշմամբ «ընդդեմ թալանին»: Երթին մասնակցում են նաև տարբեր քաղաքական ուժերի ներկայացուցիչներ՝ ՀԱԿ-ից, «Ժառանգությունից», Հիմնադիր խորհրդարանից, քաղաքացիական հասարակության ներկայացուցիչներ:
Քաղաքացիների երթին միացել են նաև նաիրիտցիները: Բողոքող քաղաքացիները «մենք ենք տերը մեր երկրի», «ընդդեմ թալանին», «ոչ ռեժիմին» կոչերով Ազատության հրապարակից շարժվեցին դեպի Սայաթ-Նովա, Աբովյան փողոցներ, այնուհետև Հանրապետության հրապարակ: Այստեղ իրավիճակը դուրս եկավ ոստիկանների վերահսկողությունից: Ոստիկանները պատ կազմած թույլ չէին տալիս, որպեսզի քաղաքացիներն իրենց բողոքի ձայնը բարձրացնեին Հանրապետության հրապարակի կենտրոնական մասում:
Կարդացեք նաև
Այստեղ բախում տեղի ունեցավ քաղաքացիների և ոստիկանների միջև, քաղաքացիները ճեղքեցին շղթան ու Հանրապետության հրապարակի կենտրոնում նստացույց կազմակերպեցին: Թմբուկներ, կոչեր, պայքարի երգեր: Այսպիսի տրամադրություն էր տիրում: Երթի մասնակիցները իրենց ուղին շարունակեցին Ամիրյան փողոցով, Մաշտոցի պողոտայով, այնուհետև վերադարձան Ազատության հրապարակ:
Նշենք, որ երթի ընթացքում, բացի ՀՀ դրոշից և տարբեր կոչերով պաստառներից, ծածանվում էր նաև անարխիզմի դրոշը:
Մանրամասները՝ քիչ ուշ:
Տաթև ՀԱՐՈՒԹՅՈՒՆՅԱՆ
