«Երբ նախորդ տարի միայն գազի սակագինը բարձրացրին, ասում էի՝ թունելի ծայրում լույս է վառվում, իսկ հիմա էլեկտրաէներգիայի թանկացմամբ այդ լույսի հույսն էլ կմարի»,- այսօր լրագրողների հետ հանդիպման ժամանակ, անդրադառնալով էլեկտրաէներգիայի սակագնի հնարավոր բարձրացմանը, ասաց դիրիժոր, երաժշտագետ Դանիել Երաժիշտը:
Նրա ձևակերպմամբ՝ իշխանությունները մեզ ծնկի են բերում սովի, թանկացումների միջոցով. «Եթե վնաս չտան, չեն կարողանա քնել այս մարդիկ. անպայման մի վատ բան պիտի անեն, որ գիշերը հանգիստ աչք փակեն: Հայաստանում տնտեսական ստրկություն է տիրում, իսկ ստրուկը հայրենիք պաշտպանել չի կարող: Նստած պտղաբեր ծառի տակ՝ սովից մեռնում ենք»,- ասաց Դ. Երաժիշտը:
Նա հիշեց Ալ. Մակեդոնացու հոր՝ Փիլիպոսի խորհրդականին, որն ամեն առավոտ մի բան էր ասում նրան՝ հիշի՛ր, որ դու մարդ ես։
«Ես կցանկանայի, որ մեր ղեկավարներն էլ այդպիսի մի խորհրդական ունենային, որը նրանց պարբերաբար կհիշեցներ իրենց մարդ լինելու մասին»,- ասաց Դ. Երաժիշտը:
Կարդացեք նաև
«Ինչքան էլ ժողովուրդը դժգոհի, միևնույնն է. իշխանությունն իր ուզածն է անում»,- հավելեց թատերական ռեժիսոր Նիկոլայ Ծատուրյանը, ըստ որի՝ անվերջ թանկացումների հիմնական պատճառը մեկն է՝ բյուջեի դատարկությունը։
«Բոլորս էլ դժգոհում ենք ու լավ ենք անում։ Ես հիշում եմ, թե խորհրդային տարիներին մարդիկ ինչպես էին սպասում հերթական համագումարին. այդ ժամանակ մի լավ բան լինում էր անպայման, իսկ հիմա մենք ամեն շաբաթ մի վատ լուր ենք ստանում։ Իսկ բյուջեն դատարկ է, որովհետև իրենց գրպանն են լցնում, հետո մի բան գցում են ժողովրդի դեմը, որ էլի վերցնեն»,- ասաց Ն. Ծատուրյանը։
Սիրանուշ ՀԱՅՐԱՊԵՏՅԱՆ
