Ընդդեմ էլեկտրաէներգիայի սակագնի ապօրինի բարձրացման այսօրվա երթը էապես տարբերվում էր սովորական երթերից: Նախաձեռնության մասնակիցները մայրաքաղաքի կենտրոնական փողոցներով անցնելու էին հեծանիվներով, ինչը կարող էր վտանգավոր լինել:
Aravot.am-ը «Ազատության» հրապարակում հերթապահություն անող ոստիկաններից հետաքրքրվեց, թե իրենք այդ ուղղությամբ ինչ-որ բան անելո՞ւ են: «Հեծանվային երթի մասնակիցներին մենք տրամադրել ենք հատուկ կարգախումբ երթի սկզբից մինչեւ վերջ հեծանվորդների անվտանգությունն ապահովելու համար՝ նախապես իրենց ընտրած, բայց մեր կողմից ճշգրտումներ արված երթուղում: Իրենց ընտրած երթուղու Սարյան փողոցի եւ Մաշտոցի պողոտայի հատվածում ճանապարհային երթեւեկության կանոններով խախտում էր կատարվելու: Այդ պահը մասնակիցների հետ ճշտել, պայմանավորվել ենք, իրենք էլ ընդունել են», – պատասխանեց ճանապարհային ոստիկանության ճանապարհապարեկային ծառայության 1-ին սպայական գումարտակի հրամանատարի տեղակալ, ոստիկանության գնդապետ Հայկազ Մաթեւոսյանը:
Աշոտ ՀԱԿՈԲՅԱՆ