Բուհի ռեկտոր Շահեն Շահինյանի խոսքով՝ դիմումների ընդունման առաջին փուլում այս քանակությամբ դիմումների առկայության դեպքում համարյա բոլոր բաժինները հնարավոր կլինի ապահովել ուսանողներով, եթե դիմորդները կարողանան հաղթահարել ընդունելության շեմը:
Շահինյանի փոխանցմամբ՝ Կոնսերվատորիան 2011 թվականին 122 դիմորդ է ունեցել, 2012-ին՝ 120, 2013-ին՝ 179, 2014-ին՝ 143:
«Ուսանողների մեծ քանակություն ունենալը չարիք է բուհերի համար»,- համոզված է Կոնսերվատորիայի ռեկտորը, քանի որ բուհերն իրենց ֆինանսական վիճակը բարելավելու համար ընդունում են նաև թույլ դիմորդների:
Նրա խոսքով՝ Կոնսերվատորիան վերջին հինգ տարվա ընթացքում կրկնապատկել է անվճար տեղերի քանակը (հասցնելով այն 80-85-ի), որպեսզի շնորհալի երեխաներն ստիպված չլինեն կիսատ թողնել իրենց ուսումը ֆինանսական խնդիրների պատճառով: «Ցանկացած երկրում կոնսերվատորիայում սովորելը բավականին թանկ արժե, քանի որ այստեղ ուսուցումն անհատական է, և, կարելի է ասել, այնքան դասախոս պետք է լինի, որքան ուսանող կա: Դրա համար այսօր Երևանի պետական կոնսերվատորիայի ֆինանսավորումը պետության կողմից կազմում է 1,4 միլիոն դրամ, իսկ վճարովի համակարգում ուսման վճարը կազմում է 700-800 հազար դրամ:
Կարդացեք նաև
Ինչ վերաբերում է դասախոսների աշխատավարձին, Շահեն Շահինյանն ասաց, որ նախկինում այն իսկապես բավականին ցածր էր: Պատճառը նա վերագրեց սխալ հաշվարկման համակարգին և դասախոսների մեծ քանակությանը: Սակայն ներկա պահին խնդիրը բավականին բարելավվել է, ինչպես վստահեցնում է բուհի ռեկտորը, և այսօր այնտեղ 970 ուսանողների դասավանդում է 460 դասախոս՝ համեմատաբար ավելի բարձր աշխատավարձով:
Սիրանուշ ՀԱՅՐԱՊԵՏՅԱՆ
