Ինչպես արդեն տեղեկացրել ենք, Եվրոպայի խորհրդի խորհրդարանական վեհաժողովը (ԵԽԽՎ) ամառային նստաշրջանի լիագումար նիստում ձայների 140 «կողմ», 13 «դեմ», 8 «ձեռնպահ» հարաբերակցությամբ ընդունեց «Ադրբեջանում ժողովրդավարական ինստիտուտների գործունեությունը» զեկույցը: Նախապես այս զեկույցում տեղ էր գտել «Լեռնային Ղարաբաղի և յոթ այլ շրջանների գրավումը Հայաստանի կողմից» եզրույթը:
Քիչ առաջ Aravot.am-ին ԵԽԽՎ-ում հայաստանյան պատվիրակության անդամ Արփինե Հովհաննիսյանը տեղեկացրեց, որ այս եզրույթը փոխարինվել է «Վեհաժողովը քաջատեղյակ է Լեռնային Ղարաբաղի հակամարտության մասին» ձևակերպումով և վեհաժողովը հենց այդ տեսքով էլ ընդունել է զեկույցը:
Հետաքրքրվեցինք՝ ինչպե՞ս է հաջողվել դա անել, հայաստանյան պատվիրակությո՞ւնն է հատուկ աշխատանք տարել, թե՞ ԵԽԽՎ պատվիրակներն են խելքի եկել, Արփինե Հովհաննիսյանը պատասխանեց. «Ներկայացված էին մի շարք փոփոխություններ և′ հայկական պատվիրակության, և′ ԵԽԽՎ այլ անդամների կողմից:
Ինքս եմ ներկայացրել փոփոխության առաջարկությունը: Չափազանց բարդ էր ամբողջ գործընթացը, իրականում փոփոխությունների մի քանի տարբերակ էր ներկայացված՝ հանել ողջ պարբերությունը, փոխարինել այլ բառապաշարով, որը համապատասխանում է ԵԱՀԿ մինսկի խմբի չափանիշներին: Ձայների հարաբերակցությունը շատ մոտ էր: Մի քանի առաջարկներ մերժվեցին 81/81 ձայների բաշխվածության պարագայում, կամ 78/83 հարաբերակցությամբ»:
Կարդացեք նաև
Արփինե Հովհաննիսյանի փոխանցմամբ՝ ադրբեջանցի լոբբիստները կենտրոնացրել էին իրենց ողջ ուժերը ամբողջ ծավալով:
Նա տեղեկացրեց, որ դեռ առավոտյան մոնիտորինգային հանձնաժողովը ընդունել էր փոփոխությունը և որոշում էր կայացվել զեկույցից հանել Լեռնային Ղարաբաղի հետ կապված խնդրահարույց եզրույթը: Սակայն ԵԽԽՎ-ում հայաստանյան պատվիրակության անդամի փոխանցմամբ՝ Ադրբեջանը, դեմ գնալով, վեհաժողովի սկզբունքներին, համաձայն որի՝ քվեարկությունը կատարվում է մոնիտորինգային հանձնաժողովի որոշմանը համահունչ, ցանկանում էր անել ամեն ինչ, որ այլ քվեարկություն իրականանա, ինչը նրանց չհաջողվեց:
Գործոնների շարքում Արփինե Հովհաննիսյանը նշեց հետևյալը. «Առաջին հերթին հայկական պատվիրակության ջանքերը, հսկայական աշխատանք է տարվել մեր դիվանագիտական ներկայացուցչության, ԱԳՆ-ի կողմից: Ի վերջո գործոն էր նաև ԵԽԽՎ մի շարք պատվիրակների ողջամտությունը, որոնք հասկանում էին, թե իրականում ինչ է կատարվում, այլ ոչ թե ստանձնել էին Ադրբեջանի փաստաբանների դերը, ինչպես որոշները»:
Տաթև ՀԱՐՈՒԹՅՈՒՆՅԱՆ
