Լրահոս
Օրվա լրահոսը

Երևանի քաղաքապետ Տարոն Մարգարյանն աշխատանքային շրջայց է կատարել Աջափնյակ  վարչական շրջանում

Հունիս 30,2015 16:11

Երևանի քաղաքապետարանի 2015թ.-ի ծրագրերով մայրաքաղաքում շարունակվող բարեկարգման աշխատանքներին Երևանի քաղաքապետ Տարոն Մարգարյանն այս անգամ հետևել է Աջափնյակ վարչական շրջան կատարած հերթական աշխատանքային շրջայցի ընթացքում: Վարչական շրջանի ղեկավարի ուղեկցությամբ քաղաքապետն այցելել է Աջափնյակի «Գրադարանների կենտրոնացված համակարգ» ՀՈԱԿ, հետևել իրականացվող հիմնանորոգման աշխատանքների ընթացքին: Ծրագրի շրջանակում հարմարավետ  պայմաններ կապահովվեն շուրջ 3750 ընթերցողների և գրադարանում առկա շուրջ 213000 կտոր գրականությունը պահելու համար: Քաղաքապետը պատասխանատուներին հանձնարարել է ամենօրյա հսկողության տակ պահել աշխատանքների ընթացքը՝ հատուկ ուշադրություն դարձնելով որակին, նաև հետևել, որ աշխատանքներն ավարտվեն սահմանված ժամկետում: Զրուցելով գրադարանի աշխատակիցների հետ` Տարոն Մարգարյանը նշել է, որ մինչև տարեվերջ մայրաքաղաքում լիովին կլուծվի գրադարանների հիմնանորոգման տասնամյակների խնդիրը:

Աշխատանքային շրջայցի շրջանակում քաղաքապետ Տարոն Մարգարյանն այցելել է նաև «Աջափնյակ» գեղագիտական դաստիարակության կենտրոն, որտեղ ևս հիմնանորոգման աշխատանքներ են ընթանում: Քաղաքապետին զեկուցվել է, որ հիմնադրման օրից ի վեր, մշակութային օջախը երբևէ նորոգման չէր ենթարկվել:  Ծրագրի շրջանակում հարմարավետ պայմաններ կապահովվեն կենտրոնում գործող կերպարվեստի ու բեմարվեստի, հելունագործության և ձեռքի աշխատանքների, անգլերենի, դաշնամուրի, ժողովրդական և ժամանակակից պարերի, կարատեի և մարմնամարզության խմբեր հաճախող շուրջ 540 երեխաների համար։ Կրթօջախի տնօրենը կոլեկտիվի և կենտրոնի սաների ու ծնողների երախտագիտությունն է փոխանցել քաղաքապետին՝ մշակութային օջախների հանդեպ ցուցաբերվող հետևողական ուշադրության համար: Քաղաքապետն էլ վստահեցրել է, որ կրթամշակութային հաստատությունների հիմնանորոգման ծրագիրը կլինի շարունակական այնքան ժամանակ, քանի դեռ մայրաքաղաքում կա դրա անհրաժեշտությունը:

«Մենք հայտարարել էինք, որ պետք է կարճ ժամանակահատվածում նորոգման լուրջ աշխատանքներ իրականացնենք կրթամշակութային հաստատություններում, ինչն էլ այսօր հետզհետե կյանքի է կոչվում: Եվ համոզված եղեք, որ այս ծրագրերը կլինեն շարունակական, և բոլոր այն խնդիրները, որոնք դրել ենք մեր առջև, հետզհետե կստանան լուծումներ», – շեշտել է քաղաքապետը:

Երևանի քաղաքապետարան

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Հունիս 2015
Երկ Երե Չոր Հնգ Ուրբ Շաբ Կիր
« Մայիս   Հուլ »
1234567
891011121314
15161718192021
22232425262728
2930