ՀՀ-ում Ուկրաինայի նախկին դեսպան Ալեքսանդր Բոժկոն կարծում է, որ էլեկտրաէներգիայի սակագնի հարցը ՀՀ քաղաքացիների ներքին խնդիրն է, բայց ինքը հետևում է իրադարձություններին:
Aravot.am-ի հարցին` եղե՞լ է Բաղրամյան պողոտայում, մասնակցե՞լ է ցույցերին, պարոն Բոժկոն պատասխանեց. «Բաղրամյան պողոտայում չեմ եղել, կողքով եմ անցել, տեղյակ եմ իրադարձություններին, բայց չեմ մասնակցել, քանի որ վերջիվերջո նախկին դեսպանն եմ Հայաստանում»:
Նախկին դեսպանը, դառնալով հայաստանյան շարժման բնութագրմանը, նշեց. «Մենք ճանաչում ու տեսնում ենք այդ շարժումը` որպես սոցիալական շարժում. այսինքն` մարդիկ ուզում են հասնել ճշմարտության, որ այն, ինչ կապված է էլեկտրաէներգիայի սակագնի հետ, գտնի իր լուծումը, բայց ոչ առանց հասարակության մասնակցության»:
Պարոն Բոժկոն տեղին չի համարում լրատվամիջոցներում տեղ գտած այն որակումները, համաձայն որոնց` հայաստանյան շարժումն անվանվում է Մայդան: Այս առիթով նա ասաց. «Սխալ է Մայդանի պիտակ կախել ձեր շարժմանը, նրան, ինչ ՀՀ-ում կատարվում է: Այստեղ տեսնում ենք այն երիտասարդությանը, որը մի քիչ ռոմանտիկ է, իսկ ռոմանտիկ նշանակում է, որ մարդիկ պետք է պայքարեն ճշմարտության համար, թեև ես չեմ ուզում, որ դիտվի այնպես, որ ես խառնվում եմ ՀՀ ներքին գործերի մեջ»:
Կարդացեք նաև
Հարցին` շարժումը մարո՞ւմ է, թե՞ ոչ, և ինչպիսի՞ն կլինի արդյունքը, պարոն Բոժկոն արձագանքեց. «Իհարկե, հետևում եմ իրադարձություններին և տեսնում, որ իշխանությունն իր կողմից քայլեր է անում, որ փորձեն լուծել այդ հարցը: Աուդիտ են նշանակել և իհարկե, կարևորն այն է, որ հասարակությունը մասնակցի այդ գործընթացին»:
Տաթև ՀԱՐՈՒԹՅՈՒՆՅԱՆ
