Այսօր «Կովկաս» ինստիտուտում տեղի ունեցավ հերթական՝ վեցերորդ վերլուծական զեկույցի ռուսալեզու տարբերակի` «Ուկրաինական ճգնաժամի ռազմա-քաղաքական չափումները. «Հիբրիդային» դասեր հետխորհրդային տարածաշրջանի համար» շնորհանդեսը: Հեղինակն է Կովկասի ինստիտուտի փոխտնօրեն Սերգեյ Մինասյանը:
Զեկույցի ներկայացման ժամանակ ԵՊՀ պրոֆեսոր Ալեքսանդր Մարկարովը նկատեց, որ աշխատանքում ներկայացված են ուկրաինական հակամարտության զարգացման փուլերը և կատարված է համեմատական վերլուծություն այլ հետխորհրդային հակամարտությունների հետ:
Ըստ հեղինակի՝ առաջին փուլում հակամարտությունը կրում էր հիբրիդային բնույթ, այնուհետև այն ձեռք բերեց քաղաքական, ռազմական գործողությունների խառնվածք: Համեմատելով այս հակամարտությունը ղարաբաղյան հակամարտության հետ՝ պարոն Մարկարովը նշեց. «Ղարաբաղյան հակամարտությունը կարելի է բնութագրել ոչ թե հիբրիդային, այլ պասիվ ինտենսիվության հակամարտություն»:
Սերգեյ Մինասյանը Aravot.am-ի հետ զրույցում հավաստիացրեց, որ զեկույցը պատրաստելիս փորձ է արել խուսափել յուրաքանչյուր քաղաքականացման փորձից, այլ հասկանալ ուկրաինական հակամարտության դասերը, ռազմաքաղաքական զարգացումներն Ուկրաինայում և փորձել անել հետևություններ:
Կարդացեք նաև
Մեր դիտարկմանը ո՞րն է հիմնական հետևությունը, պարոն Մինասյանը պատասխանեց. «Գլխավոր հետևությունն այն է, որ այն բոլոր զինատեսակները, որոնցով Ադրբեջանը սպառնում է մեզ, որ դա իբր կարող է խաղալ վճռական դերակատարություն հայ-ադրբեջանական հարաբերություններում, ուկրաինական պետական կողմն այդ բոլոր զենքերն ու զինատեսակներն ունեին, բայց դա նրանց չօգնեց ռազմական գործողություններում»:
Տաթև ՀԱՐՈՒԹՅՈՒՆՅԱՆ
