Հայաստանի գրողների միության (ՀԳՄ) անդամ, արձակագիր, թարգմանիչ եւ դրամատուրգ Վան Արյանը Aravot.am-ի հետ զրույցում անդրադառնալով Բաղրամյան պողոտայում հոսանքի թանկացման դեմ ցույցին, ասաց.
«Անընդհատ եւ բոլորը պետք է պայքարեն, ոչ միայն երիտասարդները»:
Մեր հարցին՝ ըստ ՀԳՄ անդամի, այդ ցույցը չի՞ խանգարում միության շենքի ներսում աշխատող գրողներին, պարոն Արյանը պատասխանեց. «Ի՞նչ աշխատանք… Գրողների միությունը մի կողմ դնենք, հանրապետությունում էդ ի՞նչ աշխատանքներ են տարվում, որոնց խանգարում է ցույցը: Հայաստանում բացի թալանից ուրիշ բան չի կատարվում:
Օբյեկտիվ պահանջներ են ցույցում հնչում: Մասնագետները հաշվարկել են, որ եթե ՀէՑ-երը 50%-ով ծախսերը քչացնեն, հնարավոր կլինի հոսանքի սակագինը 15 %-ով իջնել, մինչդեռ այստեղ գերշահույթի հարցեր են: Ես չգիտեմ դա ռուսակա՞ն կողմն է, թե որ կողմը, մարդիկ ուղղակի գերշահույթը չեն ուզում կորցնել, կամ ի՞նչ է նշանակում 60 000 եվրո աշխատավարձ, ախր դա գռեհկություն է…»,-զայրացավ գրողը:
Գոհար ՀԱԿՈԲՅԱՆ
