Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում (նախագահող դատավոր՝ Արմեն Բեկթաշյան) տեղի ունեցավ հերթական դատական նիստը՝ Հայկ Կյուրեղյանի գործով: Անցկացվեց փաստաթղթերի հետազոտման փուլը: Օրինակ՝ պարզ դարձավ, որ Հայկ Կյուրեղյանը հոգեբուժական հաստատությունում հաշվառված չէ:
Նշենք, որ իր գործով դատական նիստերին չի մասնակցում Հայկ Կյուրեղյանը, քանի որ հեռացվել է Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Արմեն Բեկթաշյանի կողմից՝ ՝դատարանի նկատմամբ անհարգալից վերաբերմունք ցուցաբերելու համար:
Հայտարարությամբ հանդես եկավ հանրային պաշտպան Անժելա Պետրոսյանը: Նա մինչև այս պահը դատարանի գործողությունները համարեց անօրինական ու նշեց. «Խախտվել է ամբաստանյալի պաշտպանության իրավունքը, և դատարանի բոլոր գործողությունները անօրինական են: Ես, ըստ էության, որպես նշանակված փաստաբան՝ Հայկ Կյուրեղյանի պաշտպանությունը չեմ իրականացնում, քանի որ նա չի լիազորել, ինքն էլ չկա, որ իրականացնի իր պաշտպանությունը»:
Կարդացեք նաև
Մեղադրող դատախազը միջնորդեց հետազոտել իրեղեն ապացույցը: Դատարանը ընդմիջումից հետո հետազոտեց ատրճանակը և փամփուշտները: Դատաքննության փուլն ավարտվեց: Նիստը հետաձգվեց: Հաջորդ դատական նիստը նշանակվեց հուլիսի 21-ին, ժամը 12.00-ին:
Տաթև ՀԱՐՈՒԹՅՈՒՆՅԱՆ
