Հայաստանում ֆրանսիական համալսարանն Իրավաբանական ֆակուլտետում կրթությունն արդյունավետ կազմակերպելու նպատակով համալսարանում ստեղծել է Դատական նիստերի և վիդեոկոնֆերանսների դահլիճ, որի պաշտոնական բացումը տեղի ունեցավ այսօր:
Հայաստանում ֆրանսիական համալսարանի ռեկտոր Ժան-Ժակ Մոնտուայի խոսքով՝ համալսարանի նորաբաց այս դահլիճը կահավորվել է հայաստանյան դատական նիստերի դահլիճի դիզայնով և ունի դրան բնորոշ բոլոր հատկանիշները. «Նորաբաց դահլիճն ամբողջովին կահավորված և համալրված է նորագույն տեխնոլոգիաներով, ինչի շնորհիվ համալսարանի ուսանողներն ու դասախոսները կարող են վիդեոկոնֆերանսներ կազմակերպել արտասահմանյան համալսարանների, մասնավորապես՝ Ժան Մուլեն Լիոն 3 համալսարանի դասախոսների հետ, ինչպես նաև անցկացնել համաժողովներ, գործնական քննարկումներ, կազմակերպել դատախաղեր և այլ միջոցառումներ»,- ասաց նա:
Ի դեպ, Ժան-Ժակ Մոնտուան տեղեկացրեց, որ Հայաստանում ֆրանսիական համալսարանից բացի, նորաբաց այս դահլիճի ընձեռած հնարավորություններից կարող են օգտվել նաև Ֆրանկոֆոնիայի համալսարանական գործակալության անդամ հայաստանյան այլ համալսարանների դասախոսներն ու ուսանողները:
Հավելենք, որ Դատական նիստերի դահլիճի կահավորմանն աջակցել է Օվերն-Ռոն-Ալպ շրջանը, իսկ վիդեոկոնֆերանսի համար անհրաժեշտ սարքավորումները ձեռք են բերվել Ֆրանկոֆոնիայի համալսարանական գործակալության, Օրանժ Արմենիա ընկերության և համալսարանի միջոցներով՝ Օրանժի տեխնիկական մասնագետների ներգրավմամբ:
Կարդացեք նաև
Սիրանուշ ՀԱՅՐԱՊԵՏՅԱՆ
