Քիչ առաջ Բաղրամյան պողոտայում Երեւանի ավագանու «Բարեւ, Երեւան» դաշինքի անդամ Դավիթ Սանասարյանին էր մոտեցել Երեւանի փոխոստիկանապետ Վալերի Օսիպյանը:
Հիշեցնենք, որ այսօր Դավիթ Սանասարյանը հայտարարել էր, որ էլեկտրաէներգիայի սակագնի դեմ պայքարող ցուցարարները մնալու են Բաղրամյան պողոտայում, եւ եթե իշխանությունները իրենց պահանջները չկատարեն, ապա երկուշաբթի օրվանից մեկ քայլ առաջ են բերելու Բաղրամյան պողոտայում բարիկադ դարձած աղբամանները:
Դավիթ Սանասարյանի հետ խոսակցությունից հետո Վալերի Օսիպյանը լրագրողների հետ զրույցում վստահություն հայտնեց, որ աղբամանները չեն շարժվի. «Եթե աղբամանները շարժվեն ես դա կդիտեմ որպես ոստիկանների հետ արհեստական բախում»:
Հարցին՝ անգամ մեկ քայլ շարժվելո՞ւ դեպքում էլ, նա պատասխանեց՝ այո՛. «Եթե մեկ քայլն իրենց որեւէ բան է տալու, խնդիր չկա, տաս քայլ էլ մենք կգնանք: Չի տա, այսինքն` միանշանակ կարելի է տրամաբանել, որ սա արհեստականորեն ստեղծում է այնպիսի իրավիճակ, որ ոստիկանության հետ բախում ստեղծվի, բախում լինի, հանրությանը ցույց տան, որ բախում կա, եկե՛ք Բաղրամյան պողոտա, որպեսզի մարդիկ գան Բաղրամյան պողոտա: Չեմ կարող մեկնաբանել, մեկ քայլի մեջ տրամաբանություն չկա»:
Կարդացեք նաև
Հարցին՝ իսկ եթե առաջ տանեն ոստիկանությունը, ուժ կկիրառի՞, Վալերի Օսիպյանը պատասխանեց. «Մենք թույլ չենք տալու, ինչ արվի: Կգա երկուշաբթի, երկուշաբթի օրվան առանձնահատուկ կմոտենանք»:
Ամի ՉԻՉԱԿՅԱՆ
