«Մեդիա կենտրոնում» «Կա՞ անհրաժեշտություն սահմանադրական փոփոխությունների, թե՞ ոչ» թեմայով քննարկմանը Հելսինկյան կոմիտեի նախագահ Ավետիք Իշխանյանը մտահոգություն հայտնեց, որ սահմանադրական բարեփոխումների իրականացմամբ վարկաբեկվելու է կառավարման խորհրդարանական համակարգը:
Նա հիշեց 1995 թվականը ու համարեց, որ այն ժամանակ խորհրդարանական ընտրությունները տեղի ունեցան բռնություններով, որին զուգահեռ հանրաքվեի դրվեց Սահմանադրությունը, սակայն ՀՀ-ն սահմանադրական և իրավական պետության քննությունը չբռնեց:
Այնուհետև նշեց, թե 1990-ականներից ինքը կողմ է եղել խորհրդարանական համակարգին. «Բայց այդ համակարգին անցումը պետք է լինի ընդդիմադիր կուսակցությունների ուժեղ ճնշման արդյունքում, նման դեպք չի եղել, որ իշխանությունն իր ցանկությամբ իր լիազորությունները ցանկանա պակասեցնել: Մտահոգություն ունեմ, որ ՀՀ իշխանությունները կվարկաբեկեն խորհրդարանական հանրապետություն ասվածը»:
Պարոն Իշխանյանը թերահավատ է, որ այն իշխանությունները, որոնք Սուրիկ Խաչատրյանի պես գործչին նորից մարզպետ են նշանակում, որտեղ անպատժելիության մթնոլորտ է տիրում, հանկարծ որոշում են անցնել խորհրդարանական համակարգին:
Կարդացեք նաև
Հանրային քաղաքականության, վերլուծության և երկխոսության ինստիտուտի փորձագետ, քաղաքագետ Հովհաննես Գալստյանը նկատեց. «Տպավորություն կա, որ մոդելի փոփոխությունը կատարվում է նրա համար, որ վերարտադրությունը հեշտանա: Այս իրավիճակում խորհրդարանական մոդելը տանելու է միայն լճացման: Այդ դեպքում հիմանական դերը ԱԺ նախագահինն է լինելու»:
«Հայկական սահմանադրական իրավապաշտպան կենտրոն» հ/կ-ի նախագահ Գևորգ Մանուկյանը ևս սահմանադրական փոփոխությունների անհրաժեշտություն չի տեսնում ու նշում. «Այսպիսի սև գիծ, խարան պարունակող փաստաթուղթը փոխել կցմցումներով, կիսատ-պռատ փոփոխությունների ենթարկել պետք չէ: Մենք պետք է նոր՝ պատշաճ Սահմանադրություն ունենանք»:
APR Group կազմակերպության նախագահ Ռուբեն Սարգսյանը ներկայացրեց իրենց կատարած հարցումների արդյունքները. «Հասարակության մոտ կա անվստահություն գործընթացի հանդեպ և կա ռիսկ` Սահմանադրությունը նախկինների նման չի գործելու»:
Ավետիք Իշխանյանը նշեց, որ պետությունն ու իշխանությունը փակուղու մեջ են, քանի որ չկա դատական համակարգի անկախություն. «Գործող Սահմանադրությունը ՀՀ-ին ժողովրդավարական և իրավական պետություն դառնալու հնարավորություն չի տալիս: Ոստիկանությունն ու ԱԱԾ համակարգերն ուղիղ ենթարկվում են նախագահին: Պետերին նշանակում ու ազատում է ՀՀ նախագահը: ՀՔԾ-ի և քննչական կոմիտեի պետերին ևս նշանակում է նախագահը: Ի՞նչ իրավական պետության մասին կարող է խոսք լինել: Եթե այսպես մնա, ապա հաջորդ նախագահը դառնալու է Հովիկ Աբրահամյանը, կամ մեկ ուրիշը»:
Ըստ Ավետիք Իշխանյանի՝ փոփոխությունները Սերժ Սարգսյանն անում է իր իշխանությունը պահելու համար. «Տեսնում է, թե ինչպես են տառապում նախորդ երկու նախագահները, ուստի չի ուզում, որ ինքն էլ այդպես տառապի»:
Տաթև ՀԱՐՈՒԹՅՈՒՆՅԱՆ
