Սահմանադրական դատարանը հուլիսի 7-ին քննել է «Կուտակային կենսաթոշակի մասին» օրենքի եւ հարակից օրենքների դրույթների սահմանադրականությունը: ՍԴ նախագահ Գագիկ Հարությունյանն այսօր ընթերցեց որոշումը, ըստ որի՝ «Կուտակային կենսաթոշակի մասին» օրենքի 2-րդ հոդվածի 1-ին մասի 28, 36, 37 կետերը, 5-րդ հոդվածի 1-ին եւ 7-րդ մասը, 9-րդ հոդվածի 10-րդ մասը, 13-րդ հոդվածի 1-ին, 2-րդ, 5-րդ եւ 13-րդ մասերը, 37 հոդվածի 3-րդ եւ 5-րդ մասի «օրենքի 43 հոդվածով» դրույթը, 39 հոդվածի 2-րդ նախադասությունը, 40-րդ հոդվածի 1-ին մասի 2-րդ պարբերության «որոնց կազմը եւ առավելագույն չափը սահմանում է Կենտրոնական բանկը», 43-րդ հոդվածի 1-ին մասի 2-րդ պարբերության «ողջամիտ եկամտաբերություն» եւ 3-րդ մասի «ողջամիտ շահութաբերություն» եզրույթները, 44-րդ հոդվածի 2-րդ մասը, 46-րդ հոդվածի 7-րդ մասի 2-րդ նախադասությունը, 62-րդ հոդվածի 5-րդ մասը, 62-րդ հոդվածի 6-րդ մասի երկրորդ նախադասությունը, 63-րդ հոդվածի 7-րդ մասի երկրորդ նախադասությունը, 67-րդ հոդվածի 3-րդ մասի 6-րդ կետը, 81-րդ հոդվածի 1-ին մասը, 81-րդ հոդվածի 2-րդ մասի 1-ին եւ 2-րդ կետերը, 81-րդ հոդվածի 5-րդ մասը, 81-րդ հոդվածի 7-րդ մասը, 81-րդ հոդվածի 13-րդ մասը համապատասխանում են Հայաստանի Հանրապետության Սահմանադրությանը:
«Կուտակային կենսաթոշակների մասին» Հայաստանի Հանրապետության օրենքի 68-րդ հոդվածի առաջին մասը ճանաչել Հայաստանի Հանրապետության Սահմանադրության 83.5-րդ հոդվածին հակասող եւ անվավեր: «Կուտակային կենսաթոշակների մասին» Հայաստանի Հանրապետության օրենքի 44-րդ հոդվածի առաջին մասը, ինչպես նաեւ 45-րդ հոդվածի առաջին եւ երկրորդ մասերը այն մասով, որ տարեկան գնաճով չճշգրտված չափով վերադարձնելու երաշխիքը չի տարածվում նաեւ տվյալ 5-րդ հոդվածով նախատեսված Հայաստանի Հանրապետության պետական բյուջեից հատկացվող համապատասխան միջոցների վրա ճանաչել Հայաստանի Հանրապետության Սահմանադրությանը 1-ին, 3-րդ եւ 48.12 հոդվածների պահանջներին հակասող եւ անվավեր»:
Վերջում Գագիկ Հարությունյանը հավելեց. «Կխնդրեմ, որ շտապողական եզրակացություններ չանեք, ուսումնասիրեք մանրամասն բոլոր իրավական դիրքորոշումները, համապատասխան դրան՝ նոր ներկայացրեք ձեր դիրքորոշումը եւ կարծիքը»:
Ամի ՉԻՉԱԿՅԱՆ