Բաղրամյան պողոտայից երեկ ոստիկանության տարբեր բաժիններ բերման ենթարկված ցուցարարներից միայն իրեն վարչական պատասխանատվության ենթարկելը Armenia Today կայքի համակարգող Արգիշտի Կիվիրյանը համարում է իր նկատմամբ սկսված հալածանքների շարքից հերթական պատվեր:
«Իմ դեմ այս պահին գնում է մեկ քրեական ու իննը վարչական գործերի քննություն, սա հերթական վարչական գործն է, որը ոստիկանությունը հարուցել է իմ դեմ: Ակնհայտորեն սա վերադասի պատվերն էր, որ փորձում են խոչընդոտել իմ հասարակական գործունեությունը»,- ասաց Արգիշտի Կիվիրյանը:
Նրա պատմելով, իրեն բերման ենթարկեցին խաղաղ ցույցն իրականացնելու պահին. «Ոստիկանների կողմից որեւէ պահանջ չի էլ հնչել, առավել եւս, որ իրավունք ունեի իրականացնել իմ բողոքի ակցիան»:
Նա «սուտասան» անվանեց ՀՀ փոխոստիկանապետ Հունան Պողոսյանին, որ վերջինս պնդել է, թե բերման ենթարկված որեւէ ցուցարարի նկատմամբ վարչական գործեր չեն հարուցվել. «Նա, որ կանգնում ու այդ ստերն է ասում, թե որեւէ մեկի նկատմամբ վարչական գործ չի հարուցվել, կարող եմ փաստաթղթերը ցույց տալ, չնայած որեւէ բան չունեմ ապացուցելու, նոր չէ, որ գիտեմ՝ իրենք սուտասան են»:
Կարդացեք նաև
Մանրամասները՝ տեսանյութում
Արփինե ՍԻՄՈՆՅԱՆ
