Չայկովսկու անվան երաժշտական մասնագիտական դպրոցի սաներ Արթուր Գրիգորյանը (դաշնամուր), Անդրանիկ Աղաջանյանը (թավջութակ) և Դիանա Ադամյանը (ջութակ) դեկտեմբերի 5-15-ը Նովոսիբիրսկ քաղաքում կմասնակցեն Չայկովսկու անվան 9-րդ միջազգային պատանեկան մրցույթին:
Իսկ մինչ այդ, մրցույթի եզրափակիչ փուլ անցած հայ պատանիները՝ Արթուրը, Անդրանիկը և Դիանան, Կոմիտասի անվան կամերային երաժշտության տանն այսօր մասնակցեցին Չայկովսկու անվան 9-րդ միջազգային պատանեկան մրցույթի հայաստանյան ամփոփիչ համերգին:
Չայկովսկու անվան երաժշտական մասնագիտական դպրոցի տնօրեն Մարտուն Կոստանդյանը համերգին նախորդած մամուլի ասուլիսի ժամանակ հույս հայտնեց, որ իր ղեկավարած դպրոցի սաները Նովոսիբիրսկից հաղթանակով կվերադառնան. «Մեր երեխաները միջազգային մրցույթների դափնեկիրներ են,- ասաց նա,- ինչ վերաբերում է Հայաստանի և մրցույթի կազմակերպիչների համագործակցությանը, հուսով եմ՝ այն շարունակական կլինի»:
Ի դեպ, ասուլիսի ավարտին Չայկովսկու անվան միջազգային մրցույթի դափնեկիրների ընկերակցության գլխավոր տնօրեն Անդրեյ Շչերբակը և Երևանի Չայկովսկու անվան երաժշտական մասնագիտական դպրոցի տնօրեն Մարտուն Կոստանդյանը համագործակցության հուշագիր ստորագրեցին:
Կարդացեք նաև
Անդրեյ Շչերբակն ասաց, որ իրենք կաջակցեն Երևանում իրականացվող նախագծերին, իսկ Երևանի Չայկովսկու անվան դպրոցը կլինի մրցույթի ներկայացուցիչը Հայաստանում:
Սիրանուշ ՀԱՅՐԱՊԵՏՅԱՆ