«Իրազեկ քաղաքացիներ» հ/կ համակարգող Դանիել Իոաննիսյանը մեծ հույսեր չի կապում հուլիսի երկուսին ոստիկանների կողմից լրագրողների օրինական, մասնագիտական գործունեությունը խոչընդոտելու, պաշտոնեական լիազորություններն անցնելու, քաղաքացիների գույքը ոչնչացնելու առթիվ հարուցված քրեական գործի քննության հետ:
«Իրենք պարզապես չէին կարող գործ չհարուցել, որովհետեւ հանցագործության տարրերն ուղղակի ակնհայտ էին, մյուս կողմից փորձելու են կոծկել, որովհետեւ մտադիր չեն էականորեն քննել: Այս գործով արդեն մի քանի տասնյակ ոստիկան որպես մեղադրյալ պետք է ներգրավված լիներ, հարյուրավոր տուժողներ, բացի այդ ինչպես կարող է մի քննիչը քննել: Սա նշանակում է, որ իշխանությունները մտադիր չեն արդարացիորեն քննել այս գործը»,- ասաց Դանիել Իոաննիսյանը;
Ըստ նրա, այս քրեական գործը հարուցվել է օրենքով սահմանված ժամկետի ամենավերջին օրը. «Բաղրամյան պողոտայում ցուցարար երիտասարդների վրա գործը հարուցվել է հաշված րոպեներում: Այդ երիտասարդների դեմ հարուցված խուլիգանության հոդվածով գործը նախատեսում է առավելագույնը հիսուն հազար դրամի սանկցիա: Այս գործը հիսուներեք քննիչ է քննում, Իսկ գործը, որով որոշ ոստիկաններ մինչեւ վեց տարվա ազատազրկման կարող են դատապարտվել, որով հարյուրավոր տուժողներ կան, տասնյակ լրագրողներ, այդ գործը քննում է ՀՔԾ-ի միայն մի քննիչ»:
Արփինե ՍԻՄՈՆՅԱՆ
Կարդացեք նաև
