Լրահոս
Օրվա լրահոսը

Ո՞վ պիտի բուժէ Մելգոնեան վարժարանի վէրքը

Հուլիս 13,2015 21:03

Օրեր առաջ համացանցի վրայ շրջանառութեան մէջ դրուեցաւ խումբ մը Մելգոնեանցիներու խմբագրած բաց նամակը ուղղուած ՀՀ նախագահին: Անցնող տարիներուն մէկէ աւելի առիթներով խօսուած է նախկին Մելգոնեանցիներու համախմբման մասին: Անոնք  ունին մէկ պահանջ, որն է անյապաղ վերաբանալ «Հայ Բարեգործական Ընդհանուր Միութեան» հովանիին ներքեւ երկար տարիներ գործած Կիպրոսի «Մելգոնեան Կրթական Հաստատութիւն»ը:

Մելգոնեանի մասին շատ առիթներով տարբեր վարկածներ առաջ քաշուած են:

Մեղադրանքներ, մարմիններու միջեւ սուր քննադատութիւններ եւ ծանր պախարակումներ յատկապէս «Հայ Բարեգործական Ընդհանուր Միութեան» պատասխանատուներուն հասցէին: Թէ ո՞վ է մեղաւորը եւ ի՞նչու փակուեցաւ «Մելգոնեան» կրթարանը մինչեւ այս պահը կը մնայ  անյայտ: Վարժարանի փակումէն ամիսներ ետք միայն, տարբեր ամպիոններէ խօսուեցաւ դպրոցի շէնքի վաճառքի հանուելուն մասին: Բայց այդ մասին եղած տեղեկութիւնները մնացին գիր՝ թուղթի վրայ: Գաղտնիք ալ չէ, որ այսօր Նիկոսիոյ բաբախուն սրտին վրայ գտնուող կրթարանի պատմակերտ շէնքը կը պահպանուի Կիպրոսի պետութեան որոշումով:

Դժուար է նաեւ Մելգոնեանի այսօրուան վիճակին մասին յստակ տեղեկութիւններ ունենալ, տրուած ըլլալով, որ Կիպրահայ մեր հայրենակիցները կը նախընտրեն լուր մնալ երբ դպրոցին մասին տարբեր առիթներով հարց կը բարձրացուի: Կարելի է երկար գրել դպրոցին մասին: Սակայն այդ բլորը, ոչ մէկ բան կը փոխեն ընդհանուր իրավիճակէն: Ուշադրութիւնս գրաւեց այն հանգամանքը, որ Մելգոնեանցիները իրենց բոլոր յոյսերը սպառելէ ետք այս անգամ բաց գիրով մը դիմած են Սերժ Սարգսեանին:

Անոնց համար սփիւռքի մէջ կեդրոնական, որոշիչ, կամք ունեցող եւ որոշում պարտադրող կառոյցները կարծէք չկան: Ճարահատեալ այս մարդիկը իրաւունքի տէր են: Անոնք կը խօսին մեր ժողովուրդին համար հիմնարար արժէքի մը ՝ հայ դպրոցին մասին: Դպրոց, որ կարողականութիւնը ունի  սերունդներ պատրաստելու: Դպրոց, որ ոգեղէն ամրոց ըլլալու բոլոր նախադրեալները ունի:

Ճշմարտացի է, որ սփիւռքի տարբեր անկիւններուն այսօր հայ քաղաքական կուսակցութիւններուն միջեւ լարուածութիւն չկայ: Չկայ նոյնիսկ տարակարծութիւն եւ բոլորը հասկցած են, որ սփիւռքի հայութիւնը կ’ապրի իր ծանր օրերը:

Միջին արեւելքի պատերազմները մէկ կողմէ եւ միւս կողմէ ամերիկեան հայագաութներուն ուծացումը կը հարուածեն սփիւռքի ոգին ամենուրէք:

Բացի ասկէ, խնդրագիր նամակ շարադրողները կարեւոր համարած են յիշել Սուրիոյ պատերազմին հետեւանքով անտունի դարձած հայ պատանիները, որոնք այսօր կարիքն ունին ու ծարաւ են ուսման:

Գաղտնիք ալ չէ, որ այսօր արեւմտահայերէնը կը գտնուի  դժուարին օրերու մէջ: Հոս է, որ սփիւռքի տարբեր հատուածները իրենց ըսելիքը պէտք է ունենան:

Անոնք պէտք է որոշեն ինչն է սփիւռքի ուզածը այսօր:

Ցեղասպանութեան օրակարգը եւ նահատակներու յիշատակը յարգելու գործընթացները  անիմաստ կը դառնան եթէ օր մը, սփիւռքի մէջ հայերէն խօսող եւ արեւմտահայերէնի զարկ տուող սերունդները չգանան:

Այսօր այդ տագնապը կ’ապրին Սուրիահայերու մատղաշ սերունդները, որոնք պատերազմի պատճառով  տեղափոխուած են Հայաստան:

Անոնք, որոնք կոչուած էին արեւմտահայերէնը պահպանելու նոյնպէս Հայաստանի մէջ ամէն օր կը տարրալուծուին ու բնական ընթացքով մը կը մոռնան արեւմտահայոց հիմնական գանձը ՝ լեզուն:

Ի՞նչ ընել, ի՞նչպէս շարժիլ եւ ի՞նչ միջոցներով փրկել Մելգոնեանը:

Մեղադրանքները արդէն տարիներէ ի վեր մեզ հասցուցած են փակ պատերու դիմաց:

Ո՞վ պիտի լուծէ Մելգոնեանի հիմնախնդիրը:

Եւ ո՞վ պիտի գիտակցի, որ սփիւռքի մէջ մենք այսօր կարիքն ունինք վարժարաններու:

Այս երգը մեր նահանջի վերջին երգն է:

Մեզ չեն փրկեր մշակոյթի բոլոր դեղատոմսերը, ո՛չ երգը, ո՛չ պարը, ո՛չ բանաստեղծութիւնը, ո,չ կտաւը եւ ո՛չ հազարաւոր մարդոցմով եղած քայլարշաւներն ու հանդիսութիւնները:

Մենք կարիքն ունինք ազգային բարձր ոգեղէնով գործող եւ ազգի բոլոր հատուածներուն համար տուն եւ կամար եղող դպրոցներու:

Այդ դպրոցներուն առաջինը գուցէ «Մելգոնեան կրթական հաստատութիւն» ն է, որուն դռները փակ են այսօր եւ որ կը սպասէ իր աշխարհով մէկ սփռուած որդիներուն:

Կը մնայ հարցումը, արդեօ՞ք Հայաստանի իշխանութիւնները պիտի անսան այս կոթողական դպրոցի բացման աղերսներուն:

Եւ արդեօ՞ք մեր սրտերուն մէջ վէրք դարձած Մելգոնեանի քայլերգը պիտի լսուի Կիպրոսի սիրտէն:

Սագօ ԱՐԵԱՆ

(Մելգոնեան վարժարանի նախկին ուսուցիչ)

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Հուլիս 2015
Երկ Երե Չոր Հնգ Ուրբ Շաբ Կիր
« Հուն   Օգո »
 12345
6789101112
13141516171819
20212223242526
2728293031