iRobot կորպորացիայի փոխնախագահ և տեխնոլոգիաների գլխավոր մասնագետ Պաոլո Փիրջանյանը Թումոյում տեղի ունեցած բաց դասախոսությանը երիտասարդներին ներկայացրեց, թե որոնք են ռոբոտաշինության ոլորտում հաջողության գրավականները և ինչպես կարող են երիտասարդները կազմակերպել իրենց բիզնեսն ու այս ոլորտում հաջողություններ գրանցել: Նա նաև որոշ տեղեկություններ հաղորդեց այսօր աշխարհում ռոբոտաշինության ոլորտում գոյություն ունեցող միտումների մասին:
Ըստ այդմ՝ ռոբոտներին արդեն կարելի է վստահել ոչ միայն տան մաքրությունը, այլև հիվանդին խնամելը. ստեղծվել են հատուկ ռոբոտներ, որոնք հոգում են, որ բուժում ստացողը ժամանակին ընդունի դեղամիջոցը, կամ ռազմական ոլորտում կիրառվող ռոբոտներ, որոնք օգտագործվում են տարածքի ականազերծման և սահմանների հսկման համար:
Aravot.am-ի հետ զրույցում iRobot կորպորացիայի փոխնախագահ և տեխնոլոգիաների գլխավոր մասնագետ, Իրանում հայկական ընտանիքում ծնված, այժմ ԱՄՆ-ում բնակություն հաստատած Պաոլո Փիրջանյանը նշեց, որ այս ռոբոտները դեռ չկան հայկական շուկայում. օրինակ՝ ռազմական ոլորտի ռոբոտներն արժեն հարյուր հազարավոր դոլարներ:
Զրույցի ընթացքում անդրադարձ կատարվեց նաև նոր հաղորդակցական տեխնոլոգիաների ոլորտում Հայաստանում գոյություն ունեցող խնդիրներին, մասնավորապես այսպես կոչված «ուղեղների» արտահոսքին:
Պարոն Փիրջանյանն ասաց, որ առիթ չի ունեցել շփվելու ՀՀ իշխանությունների, պետական օղակների հետ, սակայն կարծում է, որ այս ոլորտում երիտասարդների կրթությանը բավականին մեծ ուշադրություն են դարձնում: Պաոլո Փիրջանյանն ասաց, որ մեծ ոգևորությամբ է հայ երիտասարդներին սեփական բիզնեսի կազմակերպման և ոլորտում հմտանալու մասնագիտական կարողություններ փոխանցում:
Ուղեղների արտահոսքի մասին ասաց. «Դժբախտաբար պատճառն այն է, որ բավական չափով աշխատատեղեր չկան, մանավանդ ամենախելացիների համար: Բայց փորձում ենք ուղիներ գտնել, որ կարողանանք այնպես անել, որ օգնենք Հայաստանում այս ոլորտի առաջընթացին»:
Պարոն Փիրջանյանի կարծիքով՝ Հայաստանում բավական ներուժ կա, որպեսզի ռոբոտաշինության ոլորտում անհրաժեշտ որոշ տեխնոլոգիաներ արտադրեն և արտահանեն Եվրոպա, Չինաստան, ԱՄՆ, այն երկրներ, որտեղ ռոբոտների մեծ պահանջարկ կա:
Տաթև ՀԱՐՈՒԹՅՈՒՆՅԱՆ
