Հունիսի 23-ին Բաղրամյան պողոտայում տեղի ունեցած դեպքերի առնչությամբ հարուցված քրեական գործում իր կարգավիճակի մասին տեղեկություններ չունի «Հիմնադիր խորհրդարանի» անդամ Գեւորգ Սաֆարյանը: «Ոչ վկա եմ, ոչ կասկածյալ եմ, չգիտեմ՝ ինչ եմ, էդպես բաց են թողել»,- Aravot.am-ին ասաց ակտիվիստը:
Հիշեցնենք, որ գլխավոր դատախազությունը Խուլիգանության հատկանիշներով քրեական գործ էր հարուցել, գործում ներգրավված են 237 քաղաքացի:
Գլխավոր դատախազության հաղորդագրության համաձայն, «2015թ. հունիսի 22-ի լույս 23-ի գիշերը` սկսած ժամը 19:30-ից տևական ժամանակ մի խումբ անձինք, անօրինական հավաք, երթ, ապա նաև նստացույց կազմակերպելով Երևան քաղաքի Բաղրամյան պողոտայում, ամբողջությամբ խափանել են հասարակական տրանսպորտի երթևեկությունը, բազմաթիվ քաղաքացիների ազատ տեղաշարժվելու սահմանադրական իրավունքը, խաթարել անդորրը` դրանով իսկ դիտավորությամբ խախտել են հասարակական կարգը:
Գեւորգ Սաֆարյանի խոսքով, հունիսի 23-ին իրեն ոստիկանություն են տարել քաշքշոցով, բայց ոստիկանների բիրտ ուժ չեն կիրառել. «Իմ նկատմամբ կիրառած ուժն այդքան էլ բիրտ չէ եւ փաստացի ապացուցել էլ հնարավոր չէ, որ ներգրավեն որպես տուժող: Պարզապես ձեռքերս ոլորելուց շատ են ոլորել, որ ցավեցնեն»:
Իսկ լրագրողների նկատմամբ կիրառած գործողությունների, նրանց գույքը վնասելու դեպքով հարուցված քրեական գործից ակտիվիստը մեծ սպասելիքներ չունի. «Երբեք ՀՔԾ-ի կողմից հարուցված քրեական գործն ավարտին չի հասցվում, հիմա քրեական գործը հարուցվել է լրագրողների նկատմամբ կատարված գործողությունների համար, բայց այդ գործը հարուցվեց միջազգային հանրության ճնշումներից հետո: Ռեժիմը որոշակիորեն վախենում է միջազգային հանրության ճնշումներից, դրա համար ձեւականորեն ոստիկանների նկատմամբ տույժեր եղան: Բայց միշտ էլ քրեական գործը հարուցել են, հետո ասել, որ հանցակազմ չկա ու փակել գործը»:
Նրա համոզմամբ, այս անգամ էլ ոստիկանապետը կսահմանափակվի կարգազանց ոստիկաններին միայն տույժերի ենթարկելով:
Արփինե ՍԻՄՈՆՅԱՆ
