Քո հայացքը ինձ առել է ափերի մեջ,
Ջերմ գգվում է, փայփայում է նա ինձ անվերջ,
Իսկ քո սրտի թրթիռները՝ հատիկ-հատիկ,
Լիցք են տալիս իմ ծերացած սրտի զարկին:
Կարդացեք նաև
Ու զարթնում է հավերժ քնից սիրո հուշը,
Նոր շունչ բերում հոգուս մարած թրթիռներին,
Խոր ծալքերից փոթորկում է ոգու ուժը,
Հույս ներշնչում անշնչացած արժեքներին:
Քո հայացքը մեռածին շունչ է ներարկում,
Քո հայացքը սովածին է հեշտ կշտացնում,
Քո հայացքից անջուր հողում ծիլն է բուսնում,
Քո հայացքից սեր է ծնվում անհույս սրտում:
Քո հայացքից ցուրտը տաքի է վերածվում,
Քո հայացքից սառը հոգին է ջերմանում,
Քո հայացքից անգամ պողպատն է հեշտ հալվում,
Քո հայացքից միրգն ավելի է քաղցրանում:
Քո հայացքից չբեր կինն է հեշտ մայրանում,
Քո հայացքից վիշտը ծիծաղի է փոխվում,
Քո հայացքից խայթող օձն է խոնարհ դառնում,
Քո հայացքից անսիրտ մարդն է սեր քարոզում:
Քո հայացքից ժեռ քարերն են ճաքում, կիսվում,
Քո հայացքից թշնամին է հեշտ հանձնվում,
Քո հայացքից ծառան իրեն տեր է զգում,
Քո հայացքից տիեզերքն է մեղմիկ թախծում:
Քո հայացքից մարդու վիշտն է թեթևանում,
Քո հայացքից մթնոլորտն է թունազրկվում,
Քո հայացքից չար մարդիկ են բարիանում,
Քո հայացքից սատանան հեշտ է ենթարկվում:
Քո հայացքից կայծակներն են զարկվում օդում,
Քո հայացքից մարդը մարդուն էլ չի ատում,
Քո հայացքից կակաչները շուտ են բացվում,
Քո հայացքից անամոթն է գլուխ կախում:
Քո հայացքից անգամ մութը լույս է սփռում,
Քո հայացքից հայը հային չի նախանձում,
Քո հայացքից հողը խոփին ջերմ է գրկում,
Քո հայացքից հավն ամեն օր ձու է ածում:
Քո հայացքից քարին ընկած ծիլն է աճում,
Քո հայացքից մարդը հոգսից դարդ չի անում,
Քո հայացքից չարը բարուն չի հոշոտում,
Քո հայացքից մուկն ու կատուն հաշտ են ապրում:
Քո հայացքը մարդուն երկինք է հասցնում,
Քո հայացքից վարդը չափից շատ է շիկնում,
Քո հայացքից մարդը իրեն մարդ է զգում,
Քո հայացքից անգետն է հեշտ վարպետանում:
Քո հայացքից ջուրը վայրկյանում է եռում,
Քո հայացքից արագիլներն էլ չեն չվում,
Քո հայացքից մարդ ձմռանը՝ մերկ չի մրսում,
Քո հայացքից ոզնին էլ է փշաքաղվում:
Քո հայացքից հաճախ միտքը կանգ է առնում,
Քո հայացքից հոգեվարքն է արագ մարում,
Քո հայացքից դաժան ցավն է արագ խամրում,
Քո հայացքից խնայում է մահը մարդուն:
Քո հայացքից արտը առատ բերք է տալիս,
Քո հայացքից որբի ապրելն էլ է գալիս,
Քո հայացքից հոգու մաղձն է հեշտ զուլալվում,
Քո հայացքից ագռավն անգամ չի կռկռում:
Քո հայացքից հրաբուխներն էլ չեն ժայթքում,
Քո հայացքից կակաչները չեն թառամում,
Քո հայացքից մետաղները չեն ժանգոտվում,
Քո հայացքից օդում նետն է կախված մնում:
Քո հայացքից հայրենիքն է հզորանում,
Քո հայացքից երազանքը գործ է դառնում,
Քո հայացքից պատերազմում միշտ ենք հաղթում,
Քո հայացքից Տիրոջը հեշտ ենք խոնարհվում:
Քո հայացքից դավաճաններ քիչ են ծնվում,
Քո հայացքից չար մարդիկ են բարիանում,
Քո հայացքից նենգ թշնամին չի կրակում,
Քո հայացքից չարն իր զենքը վայր է դնում:
Քո հայացքից ձյունն է հալվում ու արտասվում,
Քո հայացքից անապատն է կանաչ հագնում,
Քո հայացքից կարոտը հեշտ քուն է մտնում,
Քո հայացքից անգամ անոտք մարդն է վազում:
Քո հայացքից սառած ջուրն է արագ հալվում,
Քո հայացքից վերքը հեշտ է ապաքինվում,
Քո հայացքից կարկուտն անձրևի է փոխվում,
Քո հայացքից սովորական ձուկն է խոսում:
Քո հայացքից գայլը գառին տեր է կանգնում,
Քո հայացքից էշը բեռից էլ չի հոգնում,
Քո հայացքից յար կորցրածը ցավ չի զգում,
Քո հայացքից վերքի սպին հետք չի թողնում:
Քո հայացքից հոգին մարմնից դուրս է ժայթքում,
Քո հայացքից մարդու սիրտը կանգ է առնում,
Քո հայացքից աղմուկը մեզ երգ է թվում,
Քո հայացքից հրեշն անգամ սեր է փնտրում:
Քո հայացքից հայրենիքը էլ չեն լքում,
Քո հայացքից սև ամպերն են հեշտ չքանում,
Քո հայացքից արյան հոսքն է կարգավորվում,
Քո հայացքից անհնարն է հեշտ կատարվում:
Քո հայացքից միտքը սրտին է ենթարկվում,
Քո հայացքից պատերազմներն են դադարում,
Քո հայացքից երկրաշարժն է արագ մարում,
Քո հայացքից մեր մեջ է հրաբուխ վառվում:
Քո հայացքից չարությունն է փոշիանում,
Քո հայացքից մարած հույսն է կենդանանում,
Քո հայացքից սատանան իր մահն է գուժում,
Քո հայացքից չարը բարուն է ծառայում:
Քո հայացքից մարդու մեռնելն էլ չի գալիս,
Քո հայացքից ուրախությունից են լալիս,
Քո հայացքից օձն իր թույնը չի ներարկում,
Քո հայացքից սատանան հեշտ է ենթարկվում:
Քո հայացքից թագավորներն են զարմանում,
Քո հայացքից վաղվա հույսերն են արթնանում,
Քո հայացքից ցամքած աղբյուրներն են ժայթքում,
Քո հայացքից քնած արժեքներն են զարթնում:
Քո հայացքից թթվածինն է առատանում,
Քո հայացքից հիվանդները ցավ չեն զգում,
Քո հայացքից վիշտը մարդուն հեշտ է լքում,
Քո հայացքից մանուկներն են անվերջ ժպտում:
Քո հայացքից սիրտն ուզում է անվերջ ճախրել,
Քո հայացքից մարդ պատրաստ է իր կյանքը տալ,
Քո հայացքից մեկնող մարդն է ուզում մնալ,
Քո հայացքից միրգն ուզում է իրեն կուլ տան:
Քո հայացքից թշնամությունն է վերանում,
Քո հայացքից սոված մարդը սով չի զգում,
Քո հայացքից մարդը հավատով է լցվում,
Քո հայացքից մեր մեջ եռանդն է ամրանում:
Քո հայացքից ջուրն է եռում ակնթարթում,
Քո հայացքից սեր է ծնվում անգութ սրտում,
Քո հայացքից հոգիներն են ջերմով պատվում,
Քո հայացքից կարուսելն է սեր շշնջում:
Քո հայացքից եղնիկն իրեն որս չի զգում,
Քո հայացքից աղվեսն էլ է անկեղծանում,
Քո հայացքից կրիային հասնել չի լինում,
Քո հայացքից ագահ մարդիկ են կշտանում:
Քո հայացքից սատանան իր վարքն է փոխում,
Քո հայացքից սուտասանը էլ չի խաբում,
Քո հայացքից կյանքը անուշ խաղ է խաղում,
Քո հայացքից ուղիղ խոսքը պատ է ծակում:
Քո հայացքից մետաղը ոսկու է փոխվում,
Քո հայացքից կարուսելն է անուշ երգում,
Քո հայացքից մեղուները էլ չեն խայթում,
Քո հայացքից գազանները խիղճ են բուրում:
Քո հայացքից կյանքը նոր իմաստ է դաջում,
Քո հայացքից մարդը լավատես է դառնում,
Քո հայացքից հույսը գործի է վերածվում,
Քո հայացքից մարդն իր հողում տեր է զգում…
Անանիա ՄԱՂԱՔՅԱՆ
