«5000 ընտանիքի շրջանում մեր կատարած հարցումները ցույց են տալիս, որ ոստիկանության աշխատանքը բացասական է գնահատում հարցվածների մոտ 20 տոկոսը, դրական` 52-ը: Արդարադատության համակարգը բացասական է գնահատում 37 և դրական` 22 տոկոսը»,-«Նոյյան տապան» մամուլի սրահում հրավիրված «Արդարադատություն՝ հայկական ոճով» խորագրով քննարկմանն այսպիսի տվյալներ ներկայացրեց «Սոցիոմետր» սոցիոլոգիական կենտրոնի տնօրեն Ահարոն Ադիբեկյանը: Նա, խոսելով ՀՀ-ում արդարադատության համակարգի և այդ ոլորտի հասարակական վստահության մասին, նշեց, թե հարցումների արդյունքները նաև ցույց են տալիս, որ մարդկանց մեծամասնությունը հիվանդ լինելու, կամ իր իրավունքները ոտնահարվելու պարագայում նախ ծանոթներին է դիմում, հետո բժշկին կամ ոստիկանություն:
«Զարթոնք» գաղափարական-քաղաքական ակումբի անդամ Արամ Գրիգորյանը հարց բարձրացրեց, թե ովքե՞ր են ՀՀ-ում արդարադատություն իրականացնողները ու նկատեց, որ անգամ եթե ունենանք կատարյալ օրենքներ, եթե համակարգը բարելավված չէ, արդարադատություն չենք ունենա: Այնուհետև նշեց. «ՀՀ-ում արդարադատության նախարարը արդարադատության հետ կապ չունի. իր գործառույթներն այլ են: Մեր երկրում արդարադատություն իրականացնելու արդար համակարգեր դեռ գոյություն չունեն, կարծում եմ` կլինեն»:
Հոգեբան Աննա Բադալյանը նկատեց, թե այս հարցում էական դերակատարություն ունի անհատի դաստիարակությունը. «Որոշիչ է նրա ներքին կուլտուրան, յուրաքանչյուրիս վարքով ձևավորվում է հասարակական գործունեություն: Անհատը, եթե կայացած է, կարող է հստակ պատասխանատվություն ունենալ իր արարքների համար, այդպիսով նա ձևավորում է ներքին կուլտուրա, որը հանգեցնում է արդարության գործառույթին»:
«Իրավունքների պաշտպանություն առանց սահմանների» հ/կ խորհրդատու-իրավաբան Անի Աղագուլյանը նշեց. «Խնդիրն այն է, որ քաղաքացիներն իրենց իրավունքներն ու պարտականությունները հաճախ պատշաճ չեն գիտակցում, ինչի պատճառով ունենում են վարչական իրավախախտումների վերաբերյալ տուգանքներ հարկային պարտավորությունների ոլորտներում»:
Կարդացեք նաև
«Պետության կարիքների զոհեր» հ/կ նախագահ Սեդրակ Բաղդասարյանը վստահեցրեց, թե ի դեմս արդարադատության՝ խոսում ենք մի երևույթի մասին, որը Հայաստանում գոյություն չունի: Նա մանրամասնեց. «Իհարկե, քաղաքացիներն էլ իրենց մեղքի բաժինն ունեն: Բայց արդարադատության նախարարությունն այս տարիներին անհասկանալի է, թե ինչով է զբաղվում: Օրինակ` 2000-ին սկսեց Հյուսիսային պողոտայի գործընթացը. հազարավոր քաղաքացիներ մտան դատարան և ոչ մի ատյանում հաջողության չհասան»:
«Իրավունքների պաշտպանություն առանց սահմանների» հ/կ անդամ- հետազոտող Հայկ Թադևոսյանն արդարադատության ոլորտում գոյություն ունեցող խնդիրները կապեց իշխանությունների տարանջատման սկզբունքի հետ ու պարզաբանեց. «Իշխանությունների տարանջատման սկզբունքը ՀՀ-ում չի գործում: Հասարակական լայն շերտերի մոտ տարածված է այն կարծիքը, որ դատական համակարգը սերտաճած է ՀՀ քաղաքական իշխանության հետ, և դատական որոշումները կայացվում են դատական իշխանության վերահսկողությամբ»:
Տաթև ՀԱՐՈՒԹՅՈՒՆՅԱՆ
Լուսանկարը` «Նոյյան տապան»-ի
