Տավուշի մարզի սահմանամերձ Ոսկեպար գյուղի բնակիչները դժգոհ էին, որ Սեւքարի անտառտնտեսությանը որպես հատատեղ հատկացվել է գյուղի Կատարքա սարի անտառապատ լանջը: Ոսկեպարի գյուղապետ Երվանդ Եգանյանը հայտնեց, որ հատատեղից ներքեւ գտնվում է գյուղի խմելու ջրի ջրահավաք ավազանը, ոսկեպարցիները մտահոգություն ունեն, որ ծառերի հատումից հետո ջրահավաք ավազանում ջուրը կարող է նվազել:
Գյուղապետի վկայությամբ՝ 1990-ական թվականներին, երբ Ոսկեպարը ադրբեջանական զինուժի կողմից ուժգին ռմբակոծվում էր, այդ տեղանքը ոսկեպարցիների համար որպես թաքստոց է ծառայել, ոսկեպարցիներն այդտեղ գիշերներ են լուսացրել: Ոսկեպարի բնակիչները նշված հատատեղի շահագործումը կանխելու համար դիմել էին Տավուշի մարզպետ Հովիկ Աբովյանին, ով հարցը ներկայացրել է Գյուղնախարարության եւ «Հայանտառի» ղեկավարությանը;
Հուլիսի 16-ին «Հայանտառի» ներկայացուցիչները Ոսկեպարում հանդիպում են ունեցել ոսկեպարցիների հետ: Հուլիսի 17-ին Սեւքարի անտառտնտեսությունում գյուղնախարարության եւ «Հայանտառի» ներկայացուցիչները, Տավուշի մարզպետարանի աշխատակազմի բնապահպանության մասնագետ Սամվել Գեւորգյանը, Ոսկեպարի գյուղապետ Երվանդ Եգանյանը հանդիպում են ունեցել;
Սեւքարի անտառտնտեսության տնօրեն, Երկրապահ կամավորականների միության Իջեւանի տարածքային կառույցի ղեկավար Աշոտ Երիցյանն ասաց, որ իրենք պատրաստակամ էին ընդառաջել սահմանամերձ Ոսկեպար գյուղի բնակիչների առաջարկին: Ոսկեպար համայնքի ղեկավար Երվանդ Եգանյանն ասաց, որ հուլիսի 17-ին Սեւքարի անտառտնտեսությունում ստորագրվել է արձանագրություն, որով կասեցվել է Կատարքա սարի հյուսիսային լանջին հաճարենիների հատատեղի շահագործումը:
Կարդացեք նաև
Ոսկան ՍԱՐԳՍՅԱՆ
