Մասնագետները ողջունում են հանրապետության ևս 100 դպրոցներում «Ազգային երգ ու պար» առարկայի ներդրումը, բայց կարծում են, որ առարկան պետք է դասավանդվի բացառապես մասնագետների կողմից:
Հիշեցնենք, որ ՀՀ կրթության և գիտության նախարար Արմեն Աշոտյանը հուլիսի 2-ին հրաման է ստորագրել 2015-2016 ուսումնական տարվանից «Ազգային երգ ու պար» առարկան ՀՀ ևս 100 հանրակրթական ուսումնական հաստատություններում ներդնելու վերաբերյալ: Առարկայի դասավանդման ծրագրում ընդգրկվել է յուրաքանչյուր մարզից 5-ական և Երևանից 50 դպրոց:
«Տկզար» շնչական նվագախմբի հիմնադիր Կառլեն Միրզոյանը, որը երկար տարիներ երգի և գեղագիտության ուսուցիչ է եղել, համոզված է, որ երեխաները երգ ու պար պետք է սովորեն հենց առաջին դասարանից, անգամ մանկապարտեզից, և հետո աստիճանաբար խորացնեն իրենց գիտելիքները: Դրա համար, նրա պնդմամբ, «Ազգային երգ ու պար» առարկան չպետք է դասավանդեն, օրինակ, ֆիզկուլտուրայի ուսուցիչները. «Մի´ արեք նման բան: Եթե առարկայի դասավանդումը չի դրվելու մասնագիտական հիմքերի վրա, ավելի լավ է ընդհանրապես չդասավանդվի»,- ասում է նա:
Գրականագետ, հրապարակախոս, արձակագիր Դավիթ Սարգսյանը ևս գտնում է, որ շատ ավելի լավ կլինի, եթե մասնագետները դասավանդեն առարկան, բայց և ընդունում է, որ միանգամից կատարյալ գործընթաց սկսվել չի կարող. «Սա շատ լավ նախագիծ է. երաժշտությունն ամենամեծ ներգործությունն ունեցող ուժերից է: Պետք է հիմքերը ճիշտ դնել, իսկ դրա համար անհրաժեշտ է ողջ մշակութային դաշտը մոբիլիզացնել»,- ասում է նա:
Կարդացեք նաև
Երաժշտագետ Արմինե Միրզոյանը համաձայն է վերը նշված կարծիքներին, միայն թե կցանկանար, որ ծրագրում տեղ հատկացվի նաև ազգային նվագարաններին. «Եկող սերունդը պետք է իմանա ազգային նվագարանների մասին: Մանկապարտեզում երեխան արդեն պիտի կարողանա իրարից տարբերել շվին ու դուդուկը, զուռնան ու պարկապզուկը: Գոնե պետք է իմանա՝ դրանք ազգային են թե ոչ: Երգն առանց նվագարանի չի կարող: Ազգային երգը, պարը և նվագարանները մի ամբողջություն են կազմում»,- ասում է երաժշտագետը:
«Ամեն երեխայի մեջ էլ երգելու և պարելու հակում կա, պարզապես պետք է կարողանաս ի սկզբանե դրան ճիշտ ընթացք տալ»,- կարծում է գրականագետ, ԵՊՀ դասախոս Սամվել Մուրադյանը:
Նրա դիտարկմամբ՝ «Ազգային երգ ու պար» առարկայի դասավանդումը լավ հնարավորություն է՝ ճիշտ ժամանակին բացահայտելու երեխայի ընդունակությունները. «Մեծանալով երեխան ընտրում է այս կամ այն մասնագիտությունը, և նրա մեջ եղած տաղանդն աստիճանաբար կորում է՝ այդպես էլ չբացահայտվելով: Եթե մեկը կոչումով երաժիշտ կամ պարող է ծնվել, ապա այս ծրագիրը կհայտնաբերի նրա տաղանդը»,- համոզված է Ս. Մուրադյանը:
Սիրանուշ ՀԱՅՐԱՊԵՏՅԱՆ
