Սանկտ Պետերբուրգի «Իմպերիալ» շապիտո-կրկեսն առաջին անգամ ելույթ կունենա Երևանում՝ օգոստոսի 29-ից հոկտեմբերի 4-ը կրկեսային մեծ տոն պարգևելով երևանցիներին ու հյուրերին:
Երևանյան հյուրախաղերը նվիրված են Լեոնիդ Ենգիբարյանի 80-ամյակին։
«Մեր հանդիսատեսն արժանի է կրկեսային այնպիսի շքեղ տոնի, որի ականատեսն ու մասնակիցը կլինի շուտով։ Վստահ եմ, որ ներկայացումը շատերին դուր կգա, և երազում եմ, որ այն դիտեն նաև Հայաստանի մարզերում: Բայց դա դեռ հստակ չէ, տեսնենք»,- ասում է Երևանի կրկեսի գեղարվեստական ղեկավար Սոս Պետրոսյանը։
«Կրկեսի համար այսօր առաջնահերթ են հետխորհրդային տարածքում, մասնավորապես՝ Հայաստանում կազմակերպվող հյուրախաղերը, որոնք առաջինը կլինեն տարածաշրջանում»,- ասում է «Իմպերիալ» շապիտո-կրկեսի պրոդյուսերի տեղակալ Անդրեյ Միտաչկինը՝ ընդգծելով, որ մեծ պատասխանատվությամբ են պատրաստվում Երևանում կայանալիք հյուրախաղերին. «Մեր պրոդյուսերը միշտ երազում էր հյուրախաղերով հանդես գալ Երևանում: Երկար ենք աշխատել ծրագրի իրականացման ուղղությամբ: Հուսով ենք, որ հանդիսատեսը լավ կընդունի ծրագիրը, որը լի է նորամուծություններով ու անակնկալներով. կենդանի ձայն՝ մոսկովյան «Լեգիոն» խմբի մենակատար Ալեքսեյ Բուլգակովից, «Վիկտորիա» պետերբուրգյան պարային համույթը, իլյուզիոն համար, Մոնյա ծաղրածուն՝ մեծահասակ հանդիսատեսի համար նախատեսված կատակային համարներով և այլն, և այլն»:
Կարդացեք նաև
Հավելենք, որ «Իմպերիալ» շապիտո-կրկեսի ելույթները կկազմակերպվեն Կոմիտասի այգու տարածքում (նախկին Դելֆինարիումի տեղում)։
Տոմսերը կարժենան 2000–5000 դրամ։
Սիրանուշ ՀԱՅՐԱՊԵՏՅԱՆ
