ԵԱՀԿ Մինսկի խմբի համանախագահներ Իգոր Պոպովը, Ջեյմս Ուորլիքը եւ Պիեռ Էնդրյուն մեկնել էին Երեւան եւ Բաքու, հանդիպելու Հայաստանի նախագահ Սերժ Սարգսյանին եւ Ադրբեջանի նախագահ Իլհամ Ալիեւին: ԵԱՀԿ գործող նախագահի անձնական ներկայացուցիչ Անջեյ Կասպրշիկը միացել է նրանց հանդիպումների ընթացքում:
ԵԱՀԿ-ի տարածած մամուլի հաղորդագրության համաձայն՝ Երեւան եւ Բաքու կատարած այցելությունների ընթացքում համանախագահները Լեռնային Ղարաբաղի երկարատեւ հակամարտության խաղաղ կարգավորման լուծման ուղղությամբ առաջընթաց գրանցելու համար ընթացիկ առաջարկները քննարկել են յուրաքանչյուր նախագահի հետ:
Նրանք ողջունել են նախագահների պատրաստակամությունը՝ իրար հանդիպել այս տարի, եւ հանձնարարել են իրենց արտաքին գործերի նախարարներին շարունակել համանախագահների հետ աշխատել նախագահների հանդիպման օրակարգի վրա:
Համանախագահները նաեւ ողջունել են շփման գծում եւ հայ-ադրբեջանական սահմանին հարաբերական կայունությունը, ինչը համընկել է վերջին ամիսներին երկու երկրներում տեղի ունեցող խոշոր միջազգային իրադարձություններին հետ: Այնուամենայնիվ նրանք մտահոգված են լարվածության վերջին աճի կապակցությամբ եւ կոչ են արել նախագահներին խուսափել մահացու սրացումներից եւ ձեռնարկել բոլոր միջոցները, որպեսզի խստորեն պահպանեն հրադադարի ռեժիմը:
Կարդացեք նաև
Հաղորդագրության համաձայն՝ նախագահները վերահաստատել են իրենց հանձնառությունը Կարմիր խաչի միջազգային կոմիտեի հովանու ներքո տվյալներ փոխանակել անհայտ կորած անձանց մասին:
Պատրաստեց Աշոտ ԻՍՐԱԵԼՅԱՆԸ
