Նոր Սահմանադրությամբ հայերենի իմացությունը պատգամավորների համար պարտադիր է: Նրանք քննություն պետք է հանձնեն հայոց լեզվից կամ թեստ: Այս առնչությամբ «Առավոտին» «Ազգային անվտանգություն» կուսակցության նախագահ Գառնիկ Իսագուլյանն ասաց. «Եթե հայերեն լավ իմանալ ասելով նկատի ունեն այն հայերենը, որով գրված է այս նախագիծը, ապա դժվար թե որեւէ մեկը հանձնի այդ քննությունը եւ դառնա պատգամավոր: Թող գրեին, թե պատգամավորը քանի սմ բոյ պետք է ունենա, ինչ գույնի աչքեր:
Ազգային փոքրամասնություններին տեղ եք տվել, ու այդ ազգային փոքրամասնության ներկայացուցիչը հայերեն չգիտի, ի՞նչ եք անելու: Մի կողմից՝ նրանց տեղ եք տվել, դա իմպերատիվ պահանջ է, մյուս կողմից էլ՝ իմպերատիվ պահանջ է, որ հայերեն պիտի իմանա: Նման հակասությունները նախագծում լիքն են»: Հարցին՝ հնարավո՞ր է, որ իշխանությունն ուզում է ազատվել իր շարքերում տեղ գտած որոշ պատգամավորներից, որոնց դժվար է պատկերացնել հայոց լեզվի թեստը հանձնելիս, Գ. Իսագուլյանը պատասխանեց. «Չգիտենք՝ այդ թեստում ինչ հարցեր են լինելու: Դե թող մաթեմատիկայից էլ թեստ հանձնեն, քաղաքական գործիչներ են՝ թող քաղաքագիտությունից էլ թեստ հանձնեն: Թող բոլոր առարկաներից թեստ հանձնեն, ինչո՞ւ միայն հայերենից»:
Հ. Ջ.
«Առավոտ» օրաթերթ
23.07.2015
