«Ոտքի, Հայաստան» նախաձեռնությունը հուլիսի 25-ին այցելել էր Վանաձոր: Նախաձեռնության համակարգող խմբի անդամ Դավիթ Սանասարյանը Aravot.am-ի հետ զրույցում ասաց, որ Վանաձորում հայտարարել են, որ «Ոտքի, Հայաստան»-ը էլեկտրաէներգիայի սակագնի բարձրացման դեմ հուլիսի 27-ին ժամը 18:00-ին Գյումրիի մոտակայքից դեպի Երեւան երթ է սկսելու. «Ոչ թե Գյումրի քաղաքի երթն է լինելու, այլ Գյումրի, Վանաձոր, Երեւան եւ մի շարք այլ քաղաքներից մասնակցելու են երթին»:
Իսկ արդեն Երեւանում՝ Ազատության հրապարակում, նախաձեռնությունը նստացույց է հայտարարելու: Մեր հարցին, թե ավտոերթ է լինելո՞ւ, Դավիթ Սանասարյանը պատասխանեց՝ ոչ, ոտքով են գնալու:
Դավիթ Սանասարյանը հայտարարել էր, որ «Ոտքի, Հայաստան» նախաձեռնությունը քաղաքացիական անհնազանդությունն անելու է երեք փուլով: Առաջինը՝ թռուցիկներ են բաժանվելու քաղաքացիներին, այնուհետեւ, երկրորդ փուլում 5 օրով արգելափակելու են Հայաստանի մյուս քաղաքների գլխավոր փողոցները, իսկ երրորդ փուլում կրկին թռուցիկներ են բաժանելու:
Aravot.am-ը հետաքրքրվեց, թե փաստորեն «Ոտքի Հայաստանը» երկրորդ քայլին է անցել, նա պատասխանեց այո՛: Հարցին, թե առաջին քայլն արդեն ավարտվե՞լ է եւ արդյունքներից գո՞հ են, նա պատասխանեց. «Դեռ չենք հասցրել ամբողջությամբ թռուցիկներ բաժանել, բայց փորձելու ենք ամեն մի բնակավայրին տեղեկացնել»:
Կարդացեք նաև
Ամի ՉԻՉԱԿՅԱՆ
