Հուլիսի 26-ին Տավուշի մարզում մեծ շուքով նշվել է Վարդավառը: Մարդիկ ընտանիքներով մեկնել են սարեր, անտառներում գտնվող աղբյուրների տաղավարներում քեֆ արել: Պետավտոտեսուչները մարզի Նոյեմբերյանի տարածաշրջանում 3-4 ավտոմեքենաներով, որոնցից մեկը «Ջիպ» մակնիշի մեքենա, ծառայություն են իրականացրել:
Նոյեմբերյանի տարածաշրջանի բնակիչ վարորդը, որը չցանկացավ, որ իր անունը հրապարակվի, մեզ հայտնեց, որ ժամը 22-ի սահմաններում իր ավտոմեքենան պետավտոտեսուչները Նոյեմբերյան քաղաքի տարածքում կանգնեցրել են: Քանի որ կարճ ժամանակում պետավտոտեսուչները 3-րդ անգամ են մեքենան կանգնեցրել, վարորդը հարցրել է, թե ինչ խախտում է ինքը կատարել: Պետավոտեսուչն ասել է, որ միջոցառում են իրականացնում, վարորդը պահանջել է ցույց տալ այդ մասին փաստաթուղթ: Վեճ է բռնկվել,որի ժամանակ պետավտոտեսուչը սպառնացել է ոստիկանության կարգախումբ կանչել եւ զայրացած ասել է. «28 հատ հարբած ոչխար ենք տարել բաժին»: Նոյեմբերյանցի վարորդն ասաց, որ պետավտոտեսուչն այդ խոսքերն ասել է 5 վկաների ներկայությամբ:
Պետավտոտեսչությունից տեղեկացանք,որ հուլիսի 26-ին Նոյեմբերյանի տարածաշրջանում ուժեղացված ծառայություն են իրականացրել ճանապարհային ոստիկանության 5-րդ վաշտի աշխատակիցները, Նոյեմբերյանում խմածության արձանագրություն է կազմվել 15 վարորդի հանդեպ:
Ոսկան ՍԱՐԳՍՅԱՆ
