Հինգ տարվա ընդմիջումից հետո «Ժիզել» բալետային ներկայացումն այսօր Ալ. Սպենդիարյանի անվան օպերայի և բալետի ազգային ակադեմիական թատրոնի բեմ բարձրացավ:
Ներկայացումը վերականգնել է ՀՀ ժողովրդական արտիստ, Օպերայի և բալետի ազգային ակադեմիական թատրոնի գլխավոր բալետմայստեր Վիլեն Գալստյանը:
«Շատ էի ուզում, որ «Ժիզել»-ը բեմ դուրս գա: Մի քիչ ինքնագործ բալետմայստերներն ասում են՝ «իմ ձևով» բեմադրեմ «Ժիզել»-ը: Բայց ես ինձ թույլ չեմ տալիս: Ազնիվ չի լինի. այս ներկայացումը ակադեմիական, դասական բալետ է, և ես աշխատել եմ սրբորեն պահպանել այն»,- ասում է Վիլեն Գալստյանը:
Ներկայացման մեջ ներգրավված են թատրոնի առաջատար արտիստներ Ժակլին Սարխոշյանը, Սյուզի Փիրումյանը, Ռուբեն Մուրադյանը, Սևակ Ավետիսյանը և ուրիշներ: Բալետային ներկայացման դիրիժորը ՀՀ վաստակավոր արտիստ Կարեն Դուրգարյանն է:
Կարդացեք նաև
Ֆրանսիացի կոմպոզիտոր Ադոլֆ Ադանի՝ դրամատիզմով հարուստ այս ստեղծագործության հիմքում ընկած է մի հին պոետիկ լեգենդ, թե ինչպես մինչև հարսանիքը մահացած հարսնացուները՝ «վիլլիսները», կեսգիշերին դուրս գալով շիրիմներից, սկսում են պարել՝ ձգտելով նորից վերապրել իրենց երջանիկ օրերը: Այստեղ սերն անասելիորեն ուժեղ է մահից, հաղթում է մահվանը՝ հերթական անգամ փաստելով սիրո անմահությունը:
Հավելենք, որ «Ժիզել» բալետով կեզրափակվի Ալ. Սպենդիարյանի անվան օպերայի և բալետի ազգային ակադեմիական թատրոնի 82-րդ թատերաշրջանը:
Սիրանուշ ՀԱՅՐԱՊԵՏՅԱՆ
