«Մեր ակնկալիքը մեկն է՝ այո՛ բարեփոխումներին, ո՛չ չարեփոխումներին»,- հուլիսի 30-ին լրագրողների հետ զրույցի ընթացքում ասաց ԱԻՄ առաջնորդ Պարույր Հայրիկյանը:
Նրա խոսքերով՝ ԱԻՄ-ն ակնկալում է, որ մնացած քաղաքական ուժերն իրենց ամբիցիաները մի կողմ կդնեն եւ կստեղծվի առաջին բացարձակ ժողովրդավար պետությունը. «Ընդդիմադիր միասնական ճակատ ստեղծելու խնդիր չկա դրված այստեղ այս պահին այդպես հրատապ դրված, բայց կա համախոհների միասնական գործողությունների կամ միասնաբար աշխատելու տրամադրվածություն: Մենք առաջինը այդ քննարկումը հրապարակավ իրականացրեցինք, որովհետեւ մասնավոր խոսակցություններն այդքան արդյունավետ չեն լինում»:
ՀԱԿ-ը կոչ է անում դիմադրության ճակատ ստեղծել, հարցին Պարույր Հայրիկյանը միանո՞ւմ է, թե՞ ոչ, ԱԻՄ առաջնորդը պատասխանեց. «Եթե ՀԱԿ-ը կոչ է անում, թո՛ղ գար միանար, երբ որ մենք հրապարակային քննարկում էինք կազմակերպել, կամ ինքը թո՛ղ ասի, թե որ օրն ինչ է անելու, մենք գնանք միանանք: Մեզ պոռոտախոսություն կամ մերկապարանոց հայտարարություններ պետք չեն: Մենք հրապարակային քննարկմանը հրավիրեցինք բոլորին, նաեւ Նիկոլ Փաշինյանին՝ Քաղաքացիական պայմանագրին, եկան նրանք, ովքեր եկան: Հիմա ով, որ ասում է՝ այս ինչ բանն է պետք, թո՛ղ ասի՝ երբ ինչ է ասում, որտեղ է անում: Եթե նրա ամբիցիաները խանգարում են, որ գա իմ նախաձեռնած միջոցառմանը, իմը ինձ չի խանգարում, որ ես գնամ մասնակցեմ ուրիշի հրավիրածին»:
Ամի ՉԻՉԱԿՅԱՆ
