Լրահոս
Օրվա լրահոսը

ՀԷՑ-ի ավտոմեքենաների «ակումուլյատորներն» ամեն տարի փոխել են, անվադողերը՝ տարին 2 անգամ. Հանրային խորհուրդ

Հուլիս 31,2015 16:40

Այսօր Հանրային խորհրդում քննարկում էր կազմակերպվել էլեկտրաէներգիայի սակագնի շարունակական բարձրացման, ՀԷՑ-ում աուդիտի մասին:

Հանրային խորհրդի անդամ Արշակ Սադոյանը բողոքեց, որ «միջին էլեկտրաէներգիան գնում են Բաշխիչ ցանցերը 19 դրամով, վաճառում են մեզ 42 դրամով, հլը դա էլ քիչ է, ուզում են 48: Հլը պատկերացրեք ինչ եք անում, ավտոմատացման այս դարում, երբ ամեն ինչ պետք է էժանանա, մեզ մոտ հակառակն է, անընդհատ դեպի ավելացում է գնում: Ես կարծում եմ, որ աուդիտ պետք է անցկացնել ոչ միայն ՀԷՑ-ում, այլ նույնիսկ Հանրային ծառայությունները կարգավորող հանձնաժողովում, թե ինչպես են համաձայնում այդ սխալ մեթոդիկայով հաշվարկներին: Իսկապես համբերության բաժակը լցվել է: Էդ ո՞ր երկրում եք տեսել, որ մայրաքաղաքի գլխավոր մայրուղին 2 շաբաթ փակ լինի»:

Arshak_Sadoyan

Արշակ Սադոյանը մտավախություն հայտնեց, որ աուդիտը ՀԷՑ-ում «դաղալ» կանցնի. «Հնարավոր չէ՞ր չհասնել ցույցերի, խելոք ձեւով լարվածությունը մեղմել»:

ՀՀ Հանրային ծառայությունները կարգավորող հանձնաժողովի ֆինանսական վերլուծության վարչության պետ Հայկ Ղոսալմյանը ներկայացրեց, թե ինչպես են հաշվարկում ՀԷՑ-ի շահույթը: Սադոյանը հետաքրքրվեց՝ շահույթն ինչպե՞ս եք որոշում՝ ինքնարժեքից կախվա՞ծ, թե՞ առանց ինքնարժեքի. «Ամորտիզացիոն ծախսերն ու շահույթը լրիվ տարբեր բաներ են: Ամորտիզացիոն ծախսերն են ավելանում ներդրված կապիտալին: Խնդրում եմ հանրությանը թյուրիմացության մեջ չգցել: Ի՞նչ են արել, որ հիմա գինն այդքան թանկանում է ու իրենց շահույթի աստիճանն էլ 2 տոկոս բարձրանում է: Երբ որ կորուստներ են, իրենց շահույթի վրա դա ազդո՞ւմ է, թե՞ ոչ»: Հանձնաժողովի անդամը բացատրեց, որ հաշվարկային շահույթի վրա չի ազդում, փաստացի շահույթի վրա ազդում է:

Արշակ Սադոյանը բողոքեց, որ ՀԷՑ-ը դա ինքնարժեքի ծախսի մեջ է մտցնում. «Օրինակ, ներկայացնում է ավտոմեքենաներ, ավտոմեքենաների ակումուլյատորներ` կուտակիչներ, որ ամեն տարի փոխում են: Գոնե ես ինքս ավտոմեքենա քշող եմ, գիտեմ, որ 2-3 տարին մեկ են փոխում, իսկ իրանց մոտ՝ ամեն տարի: Ավտոմեքենաների դողեր են ներկայացնում ձմեռային եւ ամառային, ավտոդողերի փոփոխություն տարին 2 անգամ: Այս բոլորը գրված է եւ ձեր մոտ մտած է իրենց ինքնարժեքի մեջ: Կարո՞ղ եք մեզ բացատրել, ինչո՞ւ են Վրաստանում էլեկտրաէներգիան գնում 19 դրամով, վաճառում 28-ով, մեր մոտ գնվում է 19-ով, վաճառվում 42-ով: Էդ ի՞նչ եղավ»:

Հանձնաժողովի անդամը փորձեց բացատրել, որ սակավաջուր տարի է եղել, բայց Արշակ Սադոյանը բղավեց. «Ախր ինչքա՞ն կարելի է սուտ ասել: Անցյալ տարի է եղել սակավաջրության եւ ատոմակայանի աշխատանքի ժամանակավոր դադարեցման հետ կապված սակագնի բարձրացում, իսկ դրանից հետո ատոմակայանն ավելի ինտենսիվ է աշխատել եւ Հայաստանում ջրի քանակն ավելացել է, բնական է, պիտի գինն իջներ, ոչ թե նորից բարձրանար»:

Հռիփսիմե ՋԵԲԵՋՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Հուլիս 2015
Երկ Երե Չոր Հնգ Ուրբ Շաբ Կիր
« Հուն   Օգո »
 12345
6789101112
13141516171819
20212223242526
2728293031