«Առաջարկում եմ՝ տապալենք Սերժ Սարգսյանին». Ազատագրում շարժման անդամ. (Տեսանյութ)

«Առաջարկում եմ՝ տապալենք Սերժ Սարգսյանին». Ազատագրում շարժման անդամ. (Տեսանյութ)

Այսօր Ազատության հրապարակում Սահմանադրական փոփոխությունների մասին «Ոչ թալանին» շարժման անդամներն ու քաղաքացիական ակտիվիստները քննարկում էին կազմակերպել:

Բանը հասավ նրան, որ քաղաքացիներից մեկը՝ Արմեն Մովսիսյանը, որը «Ազատագրում» շարժումն էր ներկայացնում, առաջարկեց, որ ի՞նչ Սահմանադրական փոփոխություններ, նախ պետք է Սերժ Սարգսյանի հեռացման հարցը դնել:

Նա նախ հարց տվեց քննարկման մասնակիցներին՝ այստեղ մարդ կա՞, որ ճանաչում է Սերժ Սարգսյանին, որպես նախագահ. «Բնականաբար, եթե չենք ճանաչում, էլ ի՞նչ քննարկում Սահմանադրական փոփոխությունների: Առաջին հերթին ես առաջարկում եմ՝ տապալենք իրան: Ոչ ռեժիմին ենք ասելու՝ Սերժ, հեռացիր»: Նա ասաց, որ վաղը ժամը 6-ին Ազատության հրապարակում դրա հետ կապված հավաք է անցկացնելու:

Մի կին հետաքրքրվեց՝ «Ասենք, տապալեցիր Սերժ Սարգսյանին, հետո՞»:

Այդ հարցին պատասխանեց «Հայազն» կուսակցության անդամ Արմեն Հովհաննիսյանը. «Ես, օրինակ, դրանից հետո 5 օր խմելու եմ»:

Քաղաքացիներից մեկի որակմամբ՝ Սահմանադրական փոփոխությունների նախաձեռնությունը դիվերսիա է հայ ժողովրդի դեմ ու պետք է հստակ քայլեր մշակել դրա դեմ. «Նախ իմաստուն մարդիկ են պետք, որ քննարկեն: Հետո Սահմանադրությունը հայկական պետք է լինի, ոչ թե ինչ-որ տեղից ինչ-որ մեկը բերի: Ոչ թե՝ Սերժ Սարգսյանին տապալենք, ոչ մեկդ ինձանից շատ չեք ուզում տապալել, բայց պետք է իմանանք՝ ինչ եք անելու հետո»:

Ակտիվիստները որոշեցին քննարկումները շարունակական դարձնել եւ հետագա հանդիպումներում որոշել քայլերը՝ Սահմանադրական հանրաքվեն տապալելու ուղղությամբ:

Հռիփսիմե ՋԵԲԵՋՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

 
Առցանց Առավոտի լուրերին facebook-ով բաժանորդագրվելու համար սեղմեք