Երեւան քաղաքի բնակիչ, 1985թ. ծնված Արմեն Առաքելյանը աշխատանքի տեղավորելու եւ այլ պատրվակներով մարդկանցից խոշոր չափերի գումար հափշտակելու համար 2013թ. դեկտեմբերի 13-ից դատապարտված լինելով 4 տարի 6 ամիս ժամկետով ազատազրկման՝ ՀՀ ԱՆ «Սեւան» ՔԿՀ-ում պատիժը կրելու ժամանակ նույն ՔԿՀ-ում ծանոթացել է այդտեղ պատիժը կրող տղամարդու հետ, նրա միջոցով ծանոթացել վերջինիս տեսակցության եկած, նրա կնոջ՝ Ն. Ա.-ի հետ:
Ըստ «Դատալեքս» դատական տեղեկատվական համակարգի՝ Առաքելյանը տեղեկանալով, որ ամուսինները բնակարանի կարիք ունեն, որոշել է այդ առիթով նրանցից խարդախությամբ գումարներ հափշտակել: Նա առաջարկել է որոշակի գումարի դիմաց անապահով ընտանիքներին բնակարանով ապահովող ընկերության միջոցով հերթագրել Ն. Ա.-ին եւ աջակցել նրան բնակարան հատկացնելու հարցում: Ա. Առաքելյանը նույն առաջակով դիմել է նաեւ Ն. Ա.-ի մորը՝ Կ. Ա.-ին: Արմեն Առաքելյանը հերթական անգամ զանգահարել է Կ. Ա-ին եւ գործարքը սկսելու համար նրանից 900 հազար դրամ պահանջել:
Առաքելյանը իր հանցավոր մտադրության մասին հայտնել է իր մորը՝ Վարսիկ Առաքելյանին եւ ընկերոջը՝ Ալեն Զոզանյանին: Կ. Ա.-ն 2013թ. նոյեմբերին Երեւանում որպես Ա. Առաքելյանի ղեկավարած ընկերության հաշվապահ ներկայացած Վարսիկ Առաքելյանին է փոխանցել 845 հազար դրամ: Ա. Առաքելյանը զանգահարել է Ալեն Զոզանյանին եւ ասել, որ անհրաժեշտ է կազմակերպել Ն. Ադամյանի կողմից հարցազրույց անցնելու ձեւացում եւ Ա. Զոզանյանին նյութապես շահագրգռելով՝ առաջարկել է օգտագործել հարցազրույցի պատրվակը եւ Ն. Ա.-ի անձնագրով ձեւակերպել համակարգչային տեխնիկայի ապառիկ վաճառք եւ հափշտակել համակարգչային տեխնիկան, իսկ ինքը դրա վաճառքից գոյանալիք գումարից պահանջել է միայն 30 հազար դրամ: Ա. Առաքելյանը զանգահարել եւ հանդիպման պայմանավորվածություն է ձեռք բերել Ն. Ա.-ի հետ: Դրանից հետո Ն. Ա.-ն եւ նրա մայրը՝ Կ. Ա.-ն Երեւան քաղաքում հանդիպել են Վարսիկ Առաքելյանին եւ Արմեն Զոզանյանին: Վերջինս Սայաթ-Նովա փողոցում գտնվող համակարգչային տեխնիկայի վաճառքի սրահը Ն.Ա.-ին ներկայացնելով որպես բարեգործական ընկերության գրասենյակ, Ն. Ա.-ին ուղեկցել է ներս, որտեղ վերջինս պատասխանել է իր սոցիալական պայմանների վերաբերյալ սրահի աշխատակիցների հարցերին: Այդ ընթացքում Ա. Զոզանյանը վերցնելով Ն. Ա.-ի անձնագիրը՝ փորձել է առանց նրա իմացության ապառիկ կարգով գնել համակարգչային տեխնիկա, սակայն Ն. Ա.-ի վարկային պատմության պատճառով դա չի հաջողվել: Փոխարենը Ա. Զոզանյանին հաջողվել է Ն.Ա.-ի մոտ տպավորություն ստեղծել, որ վերջինս հաջողությամբ անցել է բնակարան ստանալու համար հարցազրույցը: Այնուհետեւ Արմեն Առաքելյանը Ն. Ա.-ին եւ Կ. Ա.-ին տվել է բանկային հաշվեհամար եւ բնակարանի հերթն առաջ գցելու համար նրանցից պահանջել եւ ստացել 22 հազար դրամ: Հետո Վարսիկ Առաքելյանը Երեւանի Հյուսիսային ավտոկայարանի տարածքում հանդիպել, մորն ու աղջկան է տվել համակարգչային տեխնիկայի միջոցով պատրաստված, բնակարանի հատկացման հերթագրման համարի վերաբերյալ կեղծ ձեւաթուղթ եւ իբր կադաստրային ձեւակերպման համար նրանցից պահանջել եւ ստացել 24 հազար դրամ:
Դրանից հետո Վարսիկ Առաքելյանը որդու՝ Ա. Առաքելյանի առաջարկով գնացել է Իջեւան քաղաք եւ ստացվելիք բնակարանը գրավադրելու եւ ստացված գումարը բարեգործական ընկերության հաշվեհամարին փոխանցելու պատրվակով Ն.Ա.-ից պահանջել եւ ստացել է 120 հազար դրամ արժողության ոսկե վզնոց եւ 2 զույգ ականջօղ, որոնք հետո վաճառել եւ տիրացել է գումարին:
Կարդացեք նաև
Մինչ դատաքննությունը սկսվելը Ա. Առաքելյանը եւ Վ. Առաքելյանը միջնորդել են անցկացնել արագացված դատաքննություն, դատարանն այդ միջնորդությունը բավարարել է: Հուլիսի 17-ին Իջեւանում, Տավուշի մարզի առաջին ատյանի դատարանի դատավոր Ռաֆիկ Մելքոնյանը վճռել է Արմեն Առաքելյանին մեղավոր ճանաչել ՀՀ քրեական 178 հոդվածի 2-րդ մասի 1-ին, 2-րդ կետերով, 38-34-178 հոդվածի 1-ին մասով եւ ՀՀ քրեական օրենսգրքի 66 –րդ հոդվածի կիրառմամբ, նշանակված պատիժները լրիվ գումարելու միջոցով, պատիժ սահմանել 3 տարի ազատազրկումը, դրան մասնակիորեն գումարել նախորդ դատավճռով նշանակված պատժի չկրած մասը եւ նրան վերջնականապես դատապարտել 4 տարի ժամկետով ազատազրկման:
Դատարանը վճռել է Վարսիկ Առաքելյանին մեղավոր ճանաչել ՀՀ քրեական օրենսգրքի 178 հոդվածի 1-ին եւ 2-րդ կետերով եւ նրան դատապարտել 500 հազար դրամ տուգանքի: Դատարանը վճռել է քաղաքացիական հայցերը բավարարել, Ա. Առաքելյանից եւ Վ. Առաքելյանից համապարտության կարգով հօգուտ տուժող Կ.Ա.-ի բռնագանձել 900 հազար դրամ,իսկ հօգուտ Ն. Ա.-ի՝ 120 հազար դրամ:
Ոսկան ՍԱՐԳՍՅԱՆ
